राष्ट्रिय यू-१६ फुटबलका टिमका कप्तान जानलाई प्लस टुमा पूर्ण छात्रवृत्ति

काठमाडौं- नेपाली यु–१६ राष्ट्रिय पुरुष फुटबल टोलीका कप्तान जान लिम्बूलाई मनास्लु वर्ल्ड कलेजले प्लस टु अध्ययनका लागि छात्रवृत्ति प्रदान गरेको छ। चुच्चेपाटीस्थित मनास्लुले म्यानेजमेन्ट अध्ययनका लागि जानलाई पूर्ण छात्रवृत्ति प्रदान गरेको हो।

मनास्लुका चेयरम्यान गेहेन्द्र लामा, व्यवस्थापक कुमार मोक्तान र प्रिन्सिपल राजन श्रेष्ठ तथा जानबीच सो सम्बन्धी सम्झौतापत्रमा हस्ताक्षर भएको छ। मनास्लु कलेज यसै शैक्षिक सत्रदेखि सुरु भएको चेयरम्यान लामाले जनाएका छन्।

चेयरम्यान लामाले सामाजिक उत्तरदायित्व वहन गर्नुका साथै अभिभावकलाई खेलमा लागेर पनि आफ्ना सन्तानले अनेक क्षेत्रमा अवसर पाउन सक्छन् भन्ने सन्देश दिन हाल जानबाट यो कदमको सुरुआत गरिएको बताए। उनले इच्छुक भएको खण्डमा यु–१६ का सम्पूर्ण सदस्यलाई पनि पूर्ण छात्रवृत्तिको अवसर दिन मनास्लु तयार रहेको प्रतिबद्धता जनाए।

जानले २०७६ को एसईई सातदोबाटोस्थित लोक स्मृति विद्यालयबाट उत्तीर्ण गरेका थिए। कक्षा ३–४ देखि नै फुटबल खेल्न सुरु गरेका जान झापाको सरणामतीका स्थायी बासिन्दा हुन्। उनले विभिन्न उमेरसमूहको अन्तर्राष्ट्रिय प्रतियोगितामा नेपालको प्रतिनिधित्व गरिसकेका छन्।

जानका बाबु पनि भलिबलका पूर्व राष्ट्रिय खेलाडी हुन् ।