प्रिमियर लिग : उद्घाटन खेलमा आर्सनलले सानदार जित

काठमाडौं- इङ्ग्लिस प्रिमियर लिग (ईपीएल) को आज (शनिबार) साँझ सम्पन्न उद्घाटन खेलमा आर्सनलले फुलह्यामलाई ३-० गोलअन्तरले हराएको छ।

पछिल्लो सिजनमा दोस्रो डिभिजनको च्याम्पियनसिपबाट बढुवा भएको टिम फुलह्यामको क्राभेन कटेज रंगशालामा सम्पन्न खेलमा पाहुना टिमले सानदार जित निकालेको हो।

जितका लागि अलेक्जेन्डर लकाजेट्टे, ग्याब्रियल र पियरे इमिरिक अबुमयाङले १-१ गोल गरे। उद्घाटन खेलको आठौँ मिनेटमै लकाजेट्टेले गोल गर्दै आर्सनललाई सुरुवाती अग्रता दिलाए। उनको गोलसँगै पहिलो हाफमा आर्सनल एक गोलले अघि रह्यो।

उसले दोस्रो हाफमा दुई गोल थप्यो। ग्याब्रियलले ४९ औँ मिनेटमा गोल गरे भने कप्तान अबुमयाङले ५७ औँ मिनेटमा गोल गर्दै ३-० गोल अन्तरको अग्रता सुनिश्चित गरे।

आर्सनल र फुलह्याम ईपीएल ओपनिङ डेको खेलमा भेट भएको यो दोस्रोपटक हो, यसअघि २००७-०८ मा पनि ओपनिङ खेलमा भेट भएका थिए।

आजको खेलअघि दुई क्लबबीच लिगमा १३ पटक भेट भएकोमा एक पटक मात्र आर्सनलले हार बेहोरेको छ। आर्सनलले फुलह्यामविरुद्ध ८ जित र ४ बराबरी खेलेको थियो।

आजको जितसहित १४ पटक लिगमा प्रतिस्पर्धा गरको यी दुई क्लबमध्ये आर्सनलले जित संख्या ९ बनाएको छ।
जितसँगै अर्सनलले अंकतालिकामा ३ अंक जोडेको छ। फुलह्यामले खाता खोल्ने सकेन्।