सिजनको पहिलो खेलमै पीएसजीको पराजय

काठमाडौं– कोरोना महामारीका कारण फरवार्ड नेयमार जुनियर, केलियन एम्बाप्पे र डि मारियाको अनुपस्थितिका साथै थियागो सिल्वा बाहिरिएपछि पेरिस सेन्ट जर्मेन (पीएसजी)को पहिलो खेलमा झट्का लागेको छ।

फ्रेन्च लिग वानको साविक विजेता हुँदै गत सिजनमा अन्य तीन उपाधि जितेको पीएसजी नयाँ सिजनको पहिलो खेलमै लिन्ससँग पराजित बनेको छ। बिहीबार राति सम्पन्न खेलमा पीएसजीले लिन्ससँग १–० गोल अन्तरले हार बेहोरेको हो।

खेलको पहिलो हाफ गोलरहित बराबरीमा सकिएको थियो भने दोस्रोे हाफको ५७ औं मिनेटमा लिन्सका इग्नाटिउस जनागोले निर्णयक गोल गरे। यता पीएसजीले निर्धारित अवधिभर गोल गर्न सकेन। र, जित लिन्सको पोल्टामा पर्यो।

पहिलो खेलमा हार बेहोरेर अंकविहिन बनेको पीएसजी १७ औं स्थानमा छ। त्यस्तै लिन्स भने एक खेलमा हार र एक खेलमा जित निकालेर १२ औं स्थानमा छ।

निस लिग वानको शीर्षस्थानमा छ। सुरुवाती दुवै खेलमा जित निकाल्दै उसले ६ अंक बनाएको छ भने पछिल्लो सिजनको च्याम्पियन्स लिगमा सेमीफानल पुगेको लियोन अंकतालिकाको आठौं स्थानमा छ।