सीपीएलको उपाधि ट्रिनबागोलाई, पोलार्ड र सिमोनको सानदार प्रदर्शन

काठमाडौं– सेन्ट लुसिया जोउक्सलाई हराउँदै क्यारेबियन प्रिमियर लिग (सीपीएल)को उपाधि ट्रिनबागो नाइट राइडर्सले जितेको छ। ट्रिनबागोले सेन्ट लुसियालाई ८ विकेटले हराउँदै उपाधि जितेको हो।

टस हारेर ब्याटिङको निम्तो पाएको सेन्ट लुसियाले १९.१ ओभरमै सबै विकेट गुमाउँदै १५४ रन बनाएको थियो। १५५ रनको लक्ष्य पछ्याएको ट्रिनबागोले मात्र २ विकेटको क्षतिमा १८.१ आभर खेल्दै १५७ रन बनायो।

जितका लागि लेन्डी सिमोनले अविजित ८४ रनका योगदान दिए भने डर्रेन ब्रावोले पनि अविजित ५८ रन बनाए। यता सेन्ट जोउक्सका स्कट कुगेलेजिन र रुस्तन चेजले समान १–१ विकेट लिए।

पहिलो इनिङमा ब्याटिङ सम्हालेको सेन्ट लुसियाका आन्द्रे फ्लेचरले २९, मार्क डियलले २०, नजिबुल्लाह जर्दनले २४ र रुस्तन चेसले २२ रनको योगदान दिए। यसबाहेक अन्य खेलाडीले जोर अंकमा रन बनाउन सकेनन्।

विजेता टिमका किइरोन पोलार्डले सर्वाधिक ४ विकेट लिए भने फवाद अहमद र अली खानले समान २–२ विकेट लिए।

खेलमा सिमोन म्यान अफ दि म्याच घोषित भए। गएराति सम्पन्न प्रतियोगितामा ट्रिनबागो यस्तो टिम रह्यो जुन कुनै खेलमा पनि पराजित बनेन।