मछिन्द्र क्लबले बिदाइ गर्‍यो तीन विदेशी खेलाडी

काठमाठौं – सहिद स्मारक ए डिभिजन लिग विजेता मछिन्द्र क्लबले विदेशी खेलाडीलाई बिदाइ गरेको छ। क्लबले लकडाउनका कारण लामो समयदेखि काठमाडौंमा रहेका तीन विदेशी खेलाडीलाई बिदाइ गरेको हो।

‘तीनै जना खेलाडीलाई रिलिज पेपर दिएको हो। अब उनीहरुलाई स्वदेश फर्कने व्यवस्था गरिदिँदै छौं,’ क्लबका व्यवस्थापक अनिल श्रेष्ठले नेपाल समयसँग भने।

नेपालमा मंसिरदेखि चैत–वैसाखसम्म लिग र मोफसलका फुटबल सञ्चालन हुने भएकाले क्लबले त्यही समय सम्मका लागि मात्र विदेशी खेलाडी अनुबन्ध गरेको हुन्छ। तर उनीहरु फुटबलका खेल सकिएर विदेश फर्कनुअघि नै कडाउन सुरु भएका कारण नेपालमै थिए।

‘नेपालमै रहेका खेलाडीलाई खेल नभएको समयमा पनि सम्झौताअनुसार तलबभत्ता दिएका छौं। अब अर्को साल पनि आउने निमन्त्रणासहित हामीले खेलाडी बिदा गर्‍यौं,’ उनले भने, ‘उनीहरुले पनि खेल सम्भव भएमा अर्को वर्ष नेपाल आउने बताएका छन्।’

मछिन्द्र क्लबका डिफेन्डर पिटर सेगुन सेप्टेम्बर ६ (भदौ २१) मा नै स्वदेश फर्किसकेका छन्। अखिल खेपाल फुटबल संघ (एन्फा) को प्राविधिक प्रतिवेदनका अनुसार सेगुनले पछिल्लो ए डिभिजन लिगमा १२ खेलबाट २ गोल गरेका थिए भने एक गोल आत्मघाती भएको थियो।

साथै मछिन्द्र क्लबले बिहीबार मिडफिल्डर आन्द्रेस नियाँलाई पनि भत्ता र प्लेन टिकटसहित बिदा गरेको छ। उनी क्यामरुनका खेलाडी हुन्। उनले लिगमा ११ खेलमा सहभागी भएर एक गोल गरेका छन्।

फरवार्ड सोमिडे एडिलेजाको भने पासपोर्टको मिति सकिएका कारण घर फर्कने प्रक्रिया लम्बिएको छ। तर उनको पनि सेप्टेम्बर १४ का लागि टिकट खरिद गरिसकिएको छ।

कोरोनाका कारण उनको पासपोर्टको म्याद सकिएपछिका प्रक्रिया हुन सकेका थिएनन्।

यता क्यामरुनको दूतावास नेपालमा नभएका कारण वैकल्पिक बाटोबाट क्लबले पासपोर्ट नवीकरण प्रक्रिया अघि बढाएको व्यवस्थापक श्रेष्ठले बताए। एडिलेजाले ११ खेलमा चार गोल गरेका थिए।