यूएस ओपनको सेमीफाइनल समीकरण पूरा

काठमाडौं– आज (बिहीबार) यूएस ओपनको क्वार्टरफाइनल खेल सम्पन्न भएसँगै पुरुष र महिला दुवैतर्फको सेमीफाइनल समीकरण पूरा भएको छ। पुरुषतर्फको सेमीफाइनल खेल आगामी शनिबार हुनेछ भने महिलातर्फको भोलि शुक्रबार हुनेछ।

महिलातर्फ विश्व टेनिस बरियताको तेस्रो स्थानकी सेरेना विलियम्स अमेरिकामा जारी यूएस ओपनको सेमीफाइनल प्रवेश गरेकी छन्। उनले त्वेताना पिरोनकोवालाई २–१ को सेटमा हराउँदै अन्तिम ४ मा पुगेकी हुन्।

सेरेनाले पहिलो सेटमा ४–६ ले पछि परेको अवस्थाबाट ६–३ र ६–२ अन्तरले पुनरागमन गर्दै क्वार्टरफाइनलमा बुग्लेरियन खेलाडीलाई हराइन्। सेमीफाइनल प्रवेश गरेसँगै ३८ वर्षे सेरेनाको २४ पटक ग्राण्डस्लम जित्ने आशा कायमै छ।

सेरेनाले दोस्रो सेमीफाइनलमा पूर्व विश्व नम्बर वान खेलाडी भिक्टोरिया अजरेन्कासँग प्रतिस्पर्धा गर्नेछिन्। जसलाई सेरेनाले २०१२ र २०१३ को यूएस ओपन फाइनलमा हराउँदै टाइटल जितेकी थिइन्।

अजरेन्काले बेल्जियमकी २४ वर्षे इलिसा मेर्टेन्सलाई ६–१ र ६–० को साझो सेटमा हराउँदै सेमीफाइनल प्रवेश गरेकी हुन्।

त्यस्तै, शुक्रबार नै हुने पहिलो सेमीफाइनल खेलमा जापानी स्टार नाओमी ओसाकाले जेन्निफिर ब्राडीसँग प्रतिस्पर्का गर्नेछिन्। सेमीफाइनलका विजेताबीच फाइनल खेल सेप्टेम्बर १३ मा हुनेछ।

त्यस्तै पुरुषतर्फको शनिबार हुने पहिलो सेमीफाइनल खेलमा डेनी मेड्वेदेव र डोमिनिक थिमले प्रतिस्पर्धा गर्ने छन् भने कारेनो शनिबार नै हुने दोस्रो सेमीफाइनल खेलमा कार्रेनो बुस्टा र अलेक्जेन्डर जेवेरेव भिड्नेछन्।

पुरुषतर्फका विश्व नम्बर वान नोभाक जोकोविच अनुशासनका कारण क्वार्टरफाइनल अगावै खेलबाट बाहिरिसकेका छन्।