बेल्जियमको सानदार जित, इंग्ल्यान्डको बराबरी

काठमाडौं– फिफा वरियताको नम्बर एकमा रहेको टिम बेल्जियमले युईएफए नेसन्स लिगको मंगलबार राति सम्पन्न खेलमा आइसल्यान्डलाई ५–१ गोलअन्तरले हराएको छ।

बेल्जियमको किङ बुडोउइन रंगशालामा सम्पन्न खेलमा मिची बाट्शुयीले दुई गोल गरे भने एलेक्स विट्सेल, डिरिज मेर्टेन्स र जेरेमी डोकूले समान १–१ गोल गरे।

यता आइसल्यान्डका होल्मबर्टले १० औं मिनेटमा गरेको गोल भने पाहुना टिमका लागि सान्त्वना गोल बन्यो।

जितसहित ६ अंक जोडेको बेल्जियम लिग ए, समूह २ को शीर्षस्थानमा छ भने पराजित आइसल्यान्ड अंकविहिन रहेर समूहको पुछारमा छ।

त्यस्तै समूह २ अन्तर्गतकै अर्को खेलमा इंग्ल्यान्डले डेनमार्कसँग गोलरहित बराबरी खेलेको छ। डेनमार्कको पार्केनमा सम्पन्न खेलमा दुवै टिमले गोल गर्न नसकेपछि उनीअरुले अंक बाँडेका थिए।

यससँगै ४ अंक बनाएको इंग्ल्यान्ड समूहको दोस्रो स्थानमा छ भने एक अंकका साथ डेनमार्क तेस्रो स्थानमा छ।