इटाली र पोल्यान्डको संघर्षपूर्ण जित

काठमाडौं- यूईएफए नेसन्स कप अन्तर्गत सोमबार राति सम्पन्न खेलमा इटालीले नेदरल्यान्डविरुद्ध संघर्षपूर्ष जित निकालेको छ।

नेदरल्यान्डको आमस्टरडममा सम्पन्न खेलमा पाहुना टिमले १-० गोल अन्तरको जित निकालेको हो।

जितका लागि इटालिका निकोलो ब्यारेलाले एक गोल गरे। इटालियन लिग सिरी ए का सर्वाधिक गोलकर्ता सिरो इमोबाइलको पासमा ब्यारेलाले निर्णयक गोल गरे।

पहिलो हाफको अतिरिक्त समयमा भएको गोलबाहेक दोस्रो हाफमा दुवै टिमले गोल गर्न सकेनन्। त्यसैले लिग ए, समूह १ अन्तर्गत रहेको इटालिले तीन अंक थप गर्दै ४ अंक बनाएको छ।

ऊ ४ अंकका साथ समूहको शीर्षस्थानमा छ भने नेदरल्यान्ड ३ अंकका साथ दोस्रो स्थानमा छ।

सोही समूह अन्तर्गत सम्पन्न दोस्रो खेलमा पोल्यान्डले बोसनियाँ एण्ड हर्जगोभिनासँग २-१ गोलअन्तरको जित निकालेको छ।

बोसनियाँको चेलिक जेनिकामा सम्पन्न खेलमा जितका लागि पाहुना टिमका कमिल ग्लिक र कमिल ग्रोसिस्कीले गोल गरे।

यता बोसनियाँका ह्यारिस हज्रडानोविचले सान्त्वना गोल फर्काए।

दोस्रो खेलमा पहिलो जितसँगै पोल्यान्डले ३ अंक जोडेर तेस्रो स्थानमा ठाउँ बनाएको छ। त्यस्तै, पहिलो खेलमा इटालिसँग बराबरी खेलको बोसनियाँ भने १ अंकका साथ तालिकाको पुछारमा छ।