जोकोविच र अजारेन्का सिनसिनाटी च्याम्पियन

काठमाडौं- टेनिस बरियताको विश्व नम्बर वान खेलाडी नोभाव जोकोविच अमेरिकामा सम्पन्न वेस्टर्न एण्ड साउदर्न(सिनसिनाटी) ओपनको उपाधि विजेता बनेका छन्।

उनले शनिबार राति सम्पन्न फाइनल खेलमा क्यानडाका मिलोस रावनिकलाई हराउँदै उपाधि कब्जा गरेका हुन्।

सर्बियाका ३३ वर्षीय ग्लोबल स्टार जोकोविचले पहिलो खेल १–६ को अन्तरले गुमाए तापनि दोस्रो र तेस्रो खेलमा ६–३ र ६–४ को जित निकाले।

त्यस्तै महिला तर्फको उपाधि बेलारुसकी भिक्टोरिया अजारेन्काले जितेकी छिन्। उनले फाइनल खेलमा जापानकी नाओमी ओसाकालाई हराउँदै उपाधि जितेकी हुन्।

ओसाका चोटका कारण खेलमा उपस्थित हुन नसकेपछि उनले फाइनलअधि नै प्रतियोगिता त्यागेकी थिइन््। ओसाकाले फाइनल नखेल्ने भएपछि खेलबिनै प्रतियोगिताको उपाधि अजारेन्काले जितेकी हुन्।

सेमीफाइनल खेलमा रंगभेदी व्यवहार गरेपछि न्युयोर्कमा भइरहेको प्रतियोगिता तनावग्रस्त भएको थियो। ओसाकाले पनि रंगभेदको विरुद्धमा समर्थन गरेकी थिइन्।

न्युयोर्कमा नै भोली(अगस्ट ३१) बाट यूएस ओपन सुरु हुँदैछ।