बाटिस्टालाई हराउँदै जोकोविक फाइनलमा, ओसाकाले अजरिन्कासँग भिड्ने

काठमाडौं– विश्व टेनिस बरियताका नम्बर वान खेलाडी नोभाक जोकोविक वेस्टर्न एण्ड साउदर्न ओपनको फाइनलमा प्रवेश गरेका छन्। जोकोविकले अमेरिकाको न्युयोर्कमा भइरहेको प्रतियोगिताको सेमिफाइनलमा स्पेनका रोबर्टो बाटिस्टालाई हराएर फाइनल प्रवेश गरेका हुन्।

सर्बियन खेलाडी जोकोविकले आठौं वरियताका रोबर्टोविरुद्ध ४–६, ६–४ र ७–६ (७–०) को सेटमा जित निकालेका हुन्।

जोकोविकले उपाधिका लागि क्यानडाका मिलोस रावनिकसँग खेल्ने छन्। मिलोसले स्टेफानोस सिट्सिपासलाई ७–६ (७¬–५) र ६¬–३ ले पराजित गरेर फाइनल प्रवेश गरेका थिए।

यता, महिलातर्फको फाइनलमा जापानकी नाओमी ओसाका र बेलारुसकी भिक्टोरिया अजरिन्काबीच प्रतिस्पर्धा हुनेछ। अजरिन्काले बेलायती नम्बर एक टेनिस खेलाडी जोहान्ना कोन्टालाई ४–६, ६–४ र ६–१ को सेटमा पराजित गरिन्।

यस्तै ओसाकाले बेल्जियमकी एलिस मेर्टेन्सलाई ६–२ र ७–६ (७–५) को सेटमा पराजित गर्दै फाइनलको यात्रा तय गरेकी थिइन् ।