सेभियालाई छैटौंपटक युरोपा लिगको उपाधि

जर्मनी– स्पेनिस क्लब सेभियाले सर्वाधिक छैटौं पटक यूईएफए युरोपा लिगको उपाधि जितेको छ।

शुक्रबार रातिको फाइनल खेलमा उसले इटालियन क्लब इन्टर मिलानलाई ३–२ गोलले हराउँदै उपाधि जितेको हो।

सेभियाको जितका लागि लुक डे जोङले २ गोल गरे भने रोमेलु लुकाकुले आत्मघाती गोल गर्दै सेभियालाई गोल उपहार दिलाए।

खेलको पाँचौं मिनेटमै लुकाकुले गोल गर्दै इन्टरलाई सुरुवाती अग्रता दिलाएका थिए। तर १२ औं मिनेटमा सेभियाका डि जोङले गोल गर्दै खेल बराबरीमा ल्याए। डि जोङले नै ३३ औं मिनेटमा व्यक्तिगत दोस्रो गोल गरेर सेभियालाई अग्रतामा ल्याए। तर अग्रता धेरै समय टिकेन। इन्टरका डियगो गोडेनले ३५ औं मिनेटमा गोल गर्दै खेललाई बराबरीमा ल्याए।

पहिलो हाफ २–२ गोलको बराबरीमा रोकियो। तर दोस्रो हाफको ७४ औं मिनेटमा इन्टरका लुकाकुले लज्जास्पद आत्मघाती गोल गरे। उनले पोस्ट बाहिरको दिशामा गइरहेको गोेल पनि आफ्नै पोस्टतर्फ फर्काएर सेभियालाई गोल उपहार दिए।

सो गोलपछि फेरि इन्टर खेलमा फर्कन सकेन। यसका साथै सेभियाले ३–२ गोल अन्तरले खेल जित्यो।

उसले युरोपा लिगमा ऐतिहासिक छैटौं जित निकालेको छ। यसअघि उसले सन् २००६, २००७, २०१४, २०१५ र २०१६ मा पनि जित लिग जितेको थियो। सबैभन्दा धेरै ६ पटक युरोपा लिग जित्ने एकमात्र टिम पनि सेभिया नै हो।

यता इन्टर मिलान भने पाँच पटक फाइनलमा पुग्दा तीन पटक विजेता र दुई पटक उपविजेता बनेको छ।