रुस निर्वाचन: राष्ट्रपति पुटिनको पार्टीलाई बहुमत, धाँधली गरेको विपक्षीको आरोप

मस्को- रुसमा भएको संसदीय निर्वाचनमा राष्ट्रपति भलाद्‌मीर पुटिनको पार्टीले बहुमत प्राप्त गरेको छ। सम्पूर्ण मत गणना सकिएसँगै पुटिनको युनाइटेड रसिया पार्टीले ५० प्रतिशत मत प्राप्त गरेको छ। 

यो समर्थन अघिल्लो निर्वाचनको भन्दा केही कम भएको बीबीसीले जनाएको छ। पुटिनका कट्टर आलोचकलाई भने निर्वाचनमा सहभागी हुन प्रतिबन्ध लगाइएको थियो। 

बीबीसीका अनुसार विपक्षीहरुले मतपेटिका साटेको र जबरजस्ती मतदान गरेर धाँधली गराएको आरोपसमेत लगाएका छन्। तर, रुसको निर्वाचन आयोगले भने मतदान निष्पक्ष भएको र धाँधली नभएको स्पष्ट पारेको छ। 

निर्वाचन आयोगका अनुसार विपक्षी दल कम्युनिस्ट पार्टीलाई १९ प्रतिशत मत प्राप्त भएको छ। युनाइटेड रिसियाको बहुमतको अर्थ संसद्‌मा रहेको ४५० सिटमध्ये करिब दुई तिहाइ बहुमत प्राप्त गरेको छ। 

युनाइटेड रसिया पार्टीले सन् २०१६ मा ५४ प्रतिशत मत प्राप्त गरेको थियो।