सिटीका सिल्वा रियल सोसिडाडमा अनुबन्ध

म्यानचेस्टर सिटी– प्रिमियर क्लब म्यानचेस्टर सिटीका खेलाडी डेबिड सिल्वा रियल सोसिडाडमा अनुबन्ध भएका छन्। ३४ वर्षीय मिडफिल्डर सिल्वा स्पेनिस क्लब सोसिडाडमा दुई सिजनका लागि अनुबन्ध भएका हुन्।

भ्यालेन्सियाबाट सन् २०१० मा सिटी प्रवेश गरेका उनले ४३६ खेलमा सहभागी बनेर १४ उपाधि जितेका छन्। १० वर्ष सिटीमा बिताएका सिल्वा गत शनिबार च्याम्पियन्स लिगमा लियोनसँग पराजित बनेसँगै सम्झौताको अन्तिममा आइपुगेका थिए।

सम्झौता सकिएसँगै इटालियन क्लब लाजियोले स्पेनिस अन्तर्राष्ट्रिय खेलाडीलाई तीन वर्षका लागि अनुबन्धको प्रस्ताव गरेको थियो। तर, उनले त्यसतर्फ नगइ स्वदेशी क्लब सोसिडाड रोजेका हुन्।

पछिल्लो घरेलु सिजनको अंकतालिकामा छैटौं स्थानमा रहेको सोसिडाडका मार्टिन ओडेगार्ड आफ्नै क्लब रियल मड्रिड फर्केपछि नयाँ प्लेमेकरको खोजी गरिरहेको थियो। सोही क्रममा उसले सिल्वालाई भेटेको हो।

सिल्वाले प्रिमियर लिगमा ३०९ खेलमा सहभागी हुँदै ६० गोल गरेर सिटीलाई २०१२, २०१४, २०१८ र २०१९ मा प्रिमियर लिगको उपाधि जिताउन महत्त्वपूर्ण भूमिका निभाएका थिए।

त्यस्तै, उनले इंग्ल्यान्डको घरेलु कपका ५७ खेल खेलेर दुई एफए कप, पाँच लिग कप र तीन कम्युनिटी सिल्ड जितेका छन्। साथै उनले सिटीको तर्फबाट च्याम्पियन्स लिगमा ७० खेल खेल्दै सबैभन्दा धेरै खेलमा उपस्थित हुने खेलाडीको रेकर्ड कायम गरेका छन्।

२०१० को फिफा विश्वकप जित्दा उनी स्पेनको टिममा सहभागी थिए। र, २००८ र २०१२ को युरोपियन च्याम्पियन्ससिप पनि खेलेका थिए।

एजेन्सी