निषेधाज्ञा तोडेपछि चितवनमा हवाई फायर

काठमाडौं- चितवनमा निषेधाज्ञा तोडेपछि प्रहरीले एक राउण्ड हवाई फायर गरेको छ। निषेधाज्ञाको पहिलो दिन राप्ती नगरपालिका–१ पिप्लेमा स्थानीयले निषेधाज्ञा तोडेपछि प्रहरीले हवाई फायर गरेको हो।

सहायक प्रमुख जिल्ला अधिकारी नेत्रप्रसाद शर्माले स्थानीयको भीड जम्मा भएर निषेधाज्ञा तोडेपछि प्रहरीले एक राउण्ड हवाई फायर गरेको जानकारी दिए।

निषेधाज्ञाको समयमा भीडभाड गरेको र स्थानीय दुईपक्षबीच झडप हुने अवस्था आएपछि भीडलाई नियन्त्रणमा लिँदै निषेधाज्ञा कार्यान्वयनका लागि हवाई फायर गरिएको शर्माले बताए।

भीडलाई उत्तेजित गरेको भन्दै प्रहरीले ३२ वर्षीय ठाकुर बर्तौला जनालाई पक्राउ गरेको छ।

पिप्ले मन्दिरमा पूजा गरिएको ढुङ्गा सोही नगरपालिकाको पाख्रिबासकी सरस्वती पुन नाम गरेकी महिलाले लगेपछि स्थानीयले ढुङ्गा फिर्ता ल्याउनुपर्ने भन्दै भेला भएका थिए।

ती महिलाले सपनामा भगवानले सो ढुङ्गा ल्याउन भनेको भन्दै लगेको प्रहरीले जनाएको छ।