कोरोनाको उपचारमा संलग्न स्वास्थ्यकर्मीले अन्य रोगका बिरामीको उपचार गर्न नपाउने

काठमाडौं– कोभिड–१९ का बिरामीको उपचारमा संलग्न स्वास्थ्यकर्मी र कर्मचारीले अरु रोगका बिरामीको उपचार गर्न नपाउने गरी स्वास्थ्य तथा जनसंख्या मन्त्रालयले निर्देशिका जारी गरेको छ ।

जारी निर्देशिका अनुसार कोरोना संक्रमितको उपचारमा खटिएका स्वास्थ्यकर्मी र कर्मचारी पनि कोरोनाको जोखिममा रहेकाले अन्य रोगका बिरामीको उपचार गर्न नपाउने उल्लेख गरिएको छ ।

निर्देशिका अनुसार उपचारमा संलग्न स्वास्थ्यकर्मीलाई संक्रमितको उपचारमा बाहेक अन्य सेवाग्राही तथा घरपरिवारको सम्पर्कमा जान पनि रोक लगाइएको छ ।

साथै उपचारमा प्रत्यक्ष रुपमा संलग्न स्वास्थ्यकर्मीहरु तथा अन्य कर्मचारीहरुलाई आवश्यकता अनुसार लगातार ७ दिनसम्म बढीमा १२ घण्टासम्म काम गर्ने व्यवस्था मिलाउनुपर्ने निर्देशिकामा उल्लेख छ ।

उपचारमा प्रत्यक्ष रुपमा संलग्न स्वास्थ्यकर्मीलाई घरमा बस्न नसक्ने अवस्था आएमा स्वास्थ्यकर्मीका लागि दैनिक २ हजारको दरले अस्पतालले खर्च व्यहोर्ने निर्देशिकामा उल्लेख छ ।