राहत सामग्री लिएर गृहमन्त्री सिन्धुपाल्चोक उडे

काठमाडौं– गृहमन्त्री रामबहादुर थापा सिन्धुपाल्चोकको जुगल गाउँपालिका–२ लिदीमा गएको पहिरोमा परेका पीडितका लागि राहत सामग्री लिएर त्यसतर्फ प्रस्थान गरेका छन्।

केहीबेरअघि काठमाडौंबाट नेपाली सेनाको हेलिकप्टर लिएर गृहमन्त्री थापा सिन्धुपाल्चोक प्रस्थान गरेका हुन्। गृहसचिव महेश्वर न्यौपाने, विपद् प्राधिकरणका सिईओ सहितको टोली लिएर गृहमन्त्री थापा पहिरो गएको ठाउँतर्फ उठेको गृह मन्त्रालयले जनाएको छ।

शुक्रबार बिहान गएको पहिरोमा ३८ जना बेपत्ता भएका छन्। पहिरोले ३७ घर पुरेको छ। पहिरो गए लगत्तै आजै बिहान सभामुख अग्निप्रसाद सापकोटासमेत सिन्धुपाल्चोक पुगेका थिए। उनले पहिरो स्थलको निरीक्षण र अनुगमन गरेका छन्।

त्यहाँका सरकारी अधिकारीहरुलाई उद्धारमा खटिन उनले निर्देशन दिएका छन्। पहिरो स्थलको निरीक्षण र अनुगमन गरेर सभामुख काठमाडौं फर्किसकेको जुगल गाउँपालिकाकी उपाध्यक्ष सिर्जना तामाङले जानकारी दिइन्।