रुपन्देहीमा प्रशासनिक सेवा आलोपालो प्रणालीमा

समुदाय स्तरमा कोरोना संक्रमण बढ्दै गएपछि रुपन्देही प्रशासनले प्रशासनिक सेवा आलोपालो प्रणालीमा दिन सुरु गरेको छ।

रुपन्देहीका प्रमुख जिल्ला अधिकारी महादेब पन्थले भने, 'प्रशासन खुल्छ तर आलोपालो गरेर सेवा दिन थालेका छौं।'

हरेक बार फरक फरक पालिकाबासीलाई प्रशासनिक सेवा दिनेगरी काम सुरु गरिएको प्रजिअ पन्थले बताए। उनका अनुसार आइतबार सिद्धार्थ नगरपालिका, मर्चवारी गाउँपालिका र कञ्चन गाउँपालिकावासीलाई सेवा दिइने छ।

यसैगरी सोमबार तिलोत्तमा र लुम्बिनी सांस्कृतिक नगरपालिकावासीलाई सेवा दिइने छ । मंगलबार देवदह नगरपालिका, ओमसतिया गाउँपालिका र कोटहीमाई गाउँपालिका तथा बुधबार बुटवल उपमहानगरपालिका, सियारी गाउँपालिका र समरीमाई गाउँपालिकावासीलाई सेवा दिइने छ।

बिहीबार सैनामैना नगरपालिका, गैडहवा गाउँपालिका र रोहिणी गाउँपालिकावासीलाई सेवा दिइने छ। शुक्रबार मायादेवी गाउँपालिका र शुद्धोधन गाउँपालिकावासीलाई प्रशासनिक सेवा दिने गरी जिल्ला प्रशासन कार्यालय रुपन्देहीले तालिका बनाएको छ ।

कोरोना संक्रमण बढ्दै गएपछि जिल्ला प्रशासन कार्यालय रुपन्देहीले आलोपालो प्रणालीमा सेवा दिन थालेको हो । साउन ३० गतेदेखि अर्को सूचना जारी नहुञ्जेलसम्म जिल्लामा भएका १६ पालिकाका जनतालाई आलोपालो प्रणालीमा सेवा दिने निर्णय साउन २९ गते सम्पन्न जिल्लास्तरीय सङ्कट व्यवस्थापन समितिको बैठकले गरेको हो।