सिन्धुपाल्चोक : विकट गाउँमा पहिरो, ठूलो क्षतिको आशंका

काठमाडाैं- सिन्धुपाल्चोकको जुगल गाउँपालिका–२ स्थित विकट बस्ती लिदीमा शुक्रबार बिहानै पहिरो जाँदा कम्तीमा २२ घर पुरिएको छ।

सबेरै पहिरोले घर पुर्दा सुतिरहेका मानिसहरु पुरिएको आशंका गरिएको गाउँपालिकाका सूचना अधिकारी ध्रुव थापाले टेलिफोनमा बताए।

उनका अनुसार पहिरोमा पुरिएका १५ जनाजत्तिको सकुशल उद्धार गरिएको छ।

उनले भने, 'सुतिरहेका बेला पहिरो गएकाले धेरै क्षति भएको भन्ने खबर छ। तर विवरण आइसकेको छैन।' बस्ती निकै विकटमा रहेको र टेलिफोन सम्पर्क पनि नभएकाले कति क्षति भयो भन्ने विवरण आउन नसकेको उनले बताए।

सिन्धुपाल्चोकका सहायक प्रमुख जिल्ला अधिकारी बाबुराम खनालले २२ घर पुरिएको अपुष्ट जानकारी आएको बताए।

‘खबर आएलगत्तै टोली त्यसतर्फ परिचालन भएको छ,’ उनले भने, ‘टोली पुगिसकेको छैन। त्यहाँ पुगेपछि यकिन विवरण आउँछ।’ घटनास्थल अति विकट क्षेत्रमा रहेकाले सुरक्षाकर्मीको टोली पुग्न कम्तीमा ५ घण्टा लाग्ने बताइएको छ।

खनालले उद्धारका लागि हेलिकोप्टर लैजाने तयारी भइरहेको जानकारी दिए।