आजको मौसम : बिहान देशभर वर्षा, दिउँसो ४ वटा प्रदेशमा भारी वर्षा

जल तथा मौसम विज्ञान विभागले अहिले बिहान देशका अधिकांश भूभागमा समान्यदेखि पूर्ण बदली रही सातवटै प्रदेशका केही स्थानमा वर्षा भइरहेको जनाएको छ।

बिहान ६ बजे मौसम पूर्वानुमान बुलेटिन जारी गर्दै विभागले मनसुनी न्युन चापीय रेखा हाल पश्चिममा नेपाल नजिक दक्षिणतर्फ अवस्थित रहेको जानकारी दिएको छ।

विभागका अनुसार आज दिउँसो प्रदेश १, गण्डकी प्रदेश, कर्णाली प्रदेश र सुदूरपश्चिम प्रदेशका केही स्थानमा भारी वर्षाको सम्भावना छ। देशभर सामान्य बदली रही केही स्थानमा मेघ गर्जन र चट्याङसहित हल्कादेखि मध्यम वर्षाको सम्भावना रहेको विभागले बताएको छ।

आज राति बागमती प्रदेश, प्रदेश १, गण्डकी प्रदेश, कर्णाली प्रदेश र सुदूरपश्चिम प्रदेशका केही स्थानमा भारी वर्षाको सम्भावना छ।

भारी वर्षाको सम्भावना रहेका क्षेत्रका नदीमा पानीको बहाव बढ्ने, पहाडी क्षेत्रमा भूक्षय हुने, पहिरो जाने, ढल र पानीको राम्रो निकास नभएको ठाउँमा डुबान हुनसक्ने भएकोले आवश्यक सतर्कता अपनाउन विभागले अनुरोध गरेको छ। भारी वर्षाका कारण सडक तथा हवाई यातायात प्रभावित हुने भन्दै सतर्क हुन विभागले भनेको छ।