‘१३ करोड खोइ मेयर साहेब ?’

पोखरा– ‘जागौं पोखरा’का अभियन्ताहरुले पोखरा महानगरापालिकामा जनताले चुनेका जनप्रतिनिधिबाटै करोडौंको आर्थिक अनियमितता भएकोले छानबिन गरी प्रष्ट पार्न महानगरलाई ध्यानाकर्षण गराएका छन् ।

उनीहरुले सुशासनको ग्यारेन्टी गर्न १५ दिनको अल्टिमेटमसहित पोखरा महानगरपालिकाका मेयर मानबहादुर जिसीलाई ध्यानाकर्षण गराएका हुन् । जनप्रतिनिधिहरु नसच्चिए विरोधका कार्यक्रम गर्न बाध्य हुने जागौं पोखराका अभियन्ताहरुले जनाएका छन् ।

महानगरमा भएको भ्रष्टाचार र आर्थिक अनियमितताका कारण पोखरावासीको शीर लाजले निहुरिएको जागौं पोखराले महानगरका मेयर जिसीलाई आज बुझाएको पत्रमा उल्लेख गरिएको छ ।

‘भ्रष्टाचार र आर्थिक अनियमिततामा चुर्लुम्म डुबेको समाचार विभिन्न सञ्चारका माध्यममा र सामाजिक सञ्जालमा बारम्बार छताछुल्ल भइरहँदा हामी पोखरावासी र जागौं पोखरा अभियानको शीर लाजले निहुरिएको छ,’ पत्रमा लेखिएको छ ।

ध्यानाकर्षण पत्रमा भनिएको छ, ‘जनताले चुनेका र करबाट पालिएका प्रतिनिधिहरुबाट नै करोडौंको आर्थिक अनियमितता भइरहँदा त्यसको छानविन गरी जनता समक्ष प्रष्ट पार्नुहुन र आगामी दिनमा सुशासनको ग्यारेन्टी गर्नुहुन यो हाम्रो अभियान १५ दिनको अल्टिमेटम सहित प्रष्ट र जोडदार माग गर्दछौं । अन्यथा हामी हाम्रा विरोधका कार्यक्रम गर्न बाध्य हुनेछौं ।’

भ्रष्टाचार भएकै दाबी गर्दै छानबिन गरेर कारवाहीको दायरामा ल्याउनुपर्ने जागौं पोखराका अभियन्ता अशोक खड्काले बताए । महानगरकै कार्यालयमा अभियन्ताहरु ध्यानाकर्षण पत्रसहित ‘१३ करोड खोइ मेयर साहेव ?’ पम्प्लेट लिएर शान्तिपूर्ण विरोध गरेका थिए ।