जुम्ला सदरमुकाममा निषेधाज्ञा

सुर्खेत- जुम्लाका सदरमुकाममा आजदेखि निषेधाज्ञा जारी गरिएको छ। जिल्ला प्रशासन कार्यालय जुम्लाले सूचना प्रकाशित गर्दै सदरमुकामस्थित चन्दननाथ नगरपालिका र तिला गाउँपालिका– ५ ढिमकोटमा निषेधाज्ञा जारी गरिएको हो।

समुदायमा कोरोना सक्रमण फैलिन नदिन आज दिउँसो ३ बजेदेखि निषेधाज्ञा जारी गरिएको प्रमुख जिल्ला अधिकारी भूपेन्द्र थापाले जानकारी दिए।

जसअनुसार चन्दननाथ नगरपालिकाको पूर्वको दानसाँघु, पश्चिममा उमगाड, उत्तरमा कर्णाली प्राविधिक शिक्षालय र दक्षिणमा तिला नदीको क्षेत्रभित्र र तिला गाउँपालिका– ५ ढिमकोट गाउँको पूर्वमा चुलाकोट, पश्चिममा जुगामूल, उत्तरमा डुङ्ग्री गाउँ र दक्षिणमा खोलीगाउँको चार किल्लाभित्र निषेधाज्ञा जारी गरिएको हो।

कर्णाली स्वास्थ्य विज्ञान प्रतिष्ठान जुम्ला पीसीआर परीक्षण गर्दा चन्दननाथ नगरपालिका वडा नं १ का वडा नं ३, वडा नं ६ र तिला गाउँपालिका– ५ ढिमकोटका एक एक जना स्थानीयमा कोरोना संक्रमण पुष्टि भएको छ।