प्रशासनको निर्देशन मानेनन् वीरगन्जका अस्पतालले, उपचार नपाएर मृत्यु भएकी युवतीमा कोरोना पुष्टि

पर्सा– वीरगन्जमा उपचार नपाएर मृत्यु भएकी युवतीमा कोरोना भाइरसको संक्रमण रहेको पुष्टि भएको छ। वीरगन्ज महानगरपालिका वडा नम्बर २ की २० वर्षीया युवतीको मृत्युपछि पीसीआर गर्दा रिपोर्ट पोजेटिभ आएको हो ।

परिवारले उनलाई शुक्रबार राति उपचारका लागि वीरगन्जका विभिन्न अस्पताल लगेका थिए। तर, नेशनल मेडिकल कलेज, तराई हस्पिटल, नारायणी बयोधा हस्पिटल, नारायणी अस्पताल, एडभान्स लगायत आधा दर्जन अस्पतालले भर्ना लिन मानेनन्।

अन्तिममा कोभिड अस्पताल गण्डक लैजाँदै गर्दा उनको मृत्यु भएको थियो। योसँगै वीरगन्जमा कोरोना संक्रमणबाट मृत्यु हुनेको संख्या १७ पुगेको छ।

वीरगन्जका अस्पतालहरुले कोरोनाको आशंकामा बिरामी लिन नमान्दा बिरामीहरुले दुःख पाउने क्रम बढेको छ।

जिल्ला प्रशासन कार्यालयले बिरामीको उपचार नगर्ने अस्पताललाई कारबाही गर्ने चेतावनी दिर्ए पनि निजी अस्पतालले प्रशासनको निर्देशन नमानेको पाइएको छ।