मधेसका युवाहरुले भने - कथित मधेशवादी नेतालाई बहिष्कार गरौँ

जनकपुरधाम- देशैभर संविधान दिवसको अवसरमा खुसियाली र कालो दिवस मनाइ रहँदा युवाहरुको एक समूहले मधेशवादी दलविरुद्ध आक्रोश पोखेका छन्। 

मधेश अधिकार संघर्ष समितिले मधेश आन्दोलनका सहिदहरुको स्मरणमा आयोजना गरेको कार्यक्रममा मधेशवादी दलका नेताहरु विरुद्ध आक्रोश पोखेका हुन्।

युवाहरुले एक कार्यक्रमको आयोजना गरी मधेश आन्दोलनमा शहादत दिनेहरुलाई नै बिर्सेको आरोप लगाउँदै मधेशवादी दलका नेताहरुलाई बहिष्कार गर्न आग्रह गरेका हुन्। 

मधेश अधिकार समितिका संयोजक सरोज मिश्रले संविधानमा केही त्रुटी रहेको स्वीकार गर्दै जसरी सत्तामा बसेर प्रदेश २ को सरकारले सोही संविधानलाई टेकेर सत्तामा रहेर संविधानविरुद्धमा बोल्नु लज्जास्पद कुरा रहेको बताए। 

उनले भने, “संविधानको विभिन्‍न धारामा टेकेर प्रदेशको सत्तामा पुगेको जसपा नेपालले जनतालाई भ्रममा राख्दै ठग्‍ने गरेकाले हामीले सो कार्यको विरोध गरेका हौँ।” 

उनले संविधान संशोधनका लागि दबाब बनाउनुको साटो सत्ताको खेलमा लागेर मधेशी जनतालाई मुर्ख बनाउने नेताहरुलाई बहिष्कार गर्ने समय आइसकेको बताए। 

सो कार्यक्रममा मधेश आन्दोलनमा सहभागी भएका युवाहरुको सहभागिता रहेको थियो।