नेकपामा तीन गुट छन्, म कसैसँग जोडिएको छैन : गौतम

काठमाडौं– नेकपा उपाध्यक्ष वामदेव गौतमले नेकपाभित्र तीनवटा गुट रहेको भन्दै आफू समूहगत रूपमा कसैसँग नजोडिएको दाबी गरेका छन्।

उनका बारेमा सञ्चारमाध्यममा विभिन्न टीकाटिप्पणी भएपछि गौतमले विज्ञप्ति निकालेर कसैसँग नजोडिएको स्पष्ट पारेका हुन्।

‘पार्टीभित्रको अन्तरविरोध हल हुन नसक्दा तीनवटा विचार समूह बनेका छन्,’ उनले भनेका छन्, ‘केपी ओली, पुष्पकमल दाहाल र माधवकुमार नेपाल जोडिनुभएको छ। म समूहगत रुपमा यी कसैसँग जोडिएको छैन र जोडिन पनि चाहन्नँ।’

उनले ओली र दाहालले भेट्न बोलाउँदा आफू जाने गरेको प्रस्ट पारेका छन्। ‘उहाँहरूलाई सल्लाहसुझाव र राय दिने गरेको छु। मैले आफूलाई स्वतन्त्र राख्ने कोसिस पनि गरेको छु,’ उनले भने, ‘पछिल्लोपटक पार्टीमा मैले राखेको ६ बुँदे प्रस्ताव त्यसकै एउटा उदाहरण हो।’
उनले पार्टी अध्यक्ष व्यक्तिमात्र नभई पार्टीभित्रको सर्वस्वीकार्य संस्था भएको भन्दै आफू अध्यक्षद्वले वा एक्लैले बोलाउँदा भेट्ने गरेको बताए।
‘मैले भेट गरेका बेला ओलीकै अगाडि गम्भीर आलोचना गर्ने गरेको छु। दाहालसँगको भेटमा पनि आलोचना गर्ने गरेको छु,’ गौतमले भने।

पार्टी अध्यक्ष दुवै वा एक्लै वोलाएको वैठक वा भेलालाई आफूले गुट नमान्ने गौतमको भनाइ छ। उनले आफूलाई यो वा त्यो गुटसँग सम्बन्धित गराएर उल्लेख नगरिदिन सञ्चारमाध्यमलाई अनुरोध पनि गरेका छन्।

सुशील भट्टलाई लगानी बोर्डको प्रमुख कार्यकारी अधिकृतमा जिम्मेवारी दिन आफूले प्रधानमन्त्रीसमक्ष सिफारिस गरेको भन्ने विषय भ्रामक रहेको उनको दाबी छ।
‘सुशील भट्ट वा कुनै पनि व्यक्तिको नियुक्तिका निम्ति मैले प्रधानमन्त्री वा कोही व्यक्तिसँग केही भनेको छैन। यो मेरो सरोकारबाहिरको विषय हो,’ गौतमले भनेका छन्।