प्रदेश १ का आन्तरिक मामिलामन्त्री सेल्फ क्वारेन्टिनमा

विराटनगर– प्रदेश १ का आन्तरिक मामिला तथा कानुनमन्त्री हिक्मतकुमार कार्की सेल्फ क्वारेन्टिनमा बसेका छन् ।

साउन १४ गते काठमाडौंमा आयोजित बैठकमा सहभागी प्रदेश २ का आन्तरिक मामिला तथा कानुन मन्त्री ज्ञानेन्द्रकुमार यादवसहित उनका सुरक्षाकर्मीलाई कोरोना संक्रमण देखिएपछि मन्त्री कार्की क्वारेन्टिनमा बसेको उनको सचिवालयले जनाएको छ ।

मन्त्री कार्कीको सचिवालयले साउन १६ गतेयता भेटघाट भएका व्यक्तिहरुलाई सतर्क रहन आग्रह गरेको छ । प्रमुख स्वकीय सचिव कमल पौडेलले ‘कोभिड १९ भाइरसको संक्रमण यस्तै हुन्छ भन्ने अवस्था नरहेको हुँदा साउन १६ गते यता भेटघाटमा रहेका सबैलाई सतर्क रहन र केही लक्षण देखिए स्वास्थ्य संस्थाको सम्पर्कमा आउन अनुरोध गरेका छन् ।

मन्त्री कार्कीले पीसीआर परीक्षणका लागि विहिबार स्वाव दिएर सेल्फ क्वारेन्टिनमा बसेको बताएका छन् ।

प्रदेश प्रहरी व्यवस्थापनसम्बन्धी बैठकमा सातै प्रदेशका आन्तरिक मामिला तथा कानुन मन्त्रीहरुसहित प्रधानमन्त्री केपी शर्मा ओली, गृहमन्त्री रामबहादुर थापा लगायत उच्च पदस्थ व्यक्तिहरुको सहभागिता थियो ।