विराटनगरमा थप १३ जनामा कोरोना पुष्टि, संक्रमित खोज्दै स्वास्थ्यकर्मी

विराटनगर- समुदायस्तरमा कोरोना फैलिएको कोरोनाबाट विराटनगरमा थप १३ जना संक्रमित भएका छन् ।

कोशी अस्पतालको प्रयोगशालमा बुधबार राति प्राप्त रिपोर्टअनुसार ५ महिला र ८ पुरुषमा संक्रमण पुष्टि भएको महानगरपालिका जनस्वास्थ्य महाशाखाका प्रमुख रमेश कार्कीले जानकारी दिए ।

उनकाअनुसार संक्रमितहरु विराटनगर महानगरपालिका–२, ६, ७, ८, १०, ११, र १३ वडाका छन्। संक्रमितमध्ये तीन पुरुष र एक महिलाको उमेर खुलेको छैन। अरु २४ देखि ६० वर्ष उमेरसम्मका छन्।

संक्रमितहरुले स्वावसँगै दिएको ठेगानाअनुसार स्वाथ्यकर्मीहरु उनीहरुको खोजीमा जुटेका छन् । कतिपय टिपाएको मोवाइल नम्बर नमिलेको र अफ भएकाले स्वास्थ्यकर्मी उनीहरुले दिएको ठेगानातर्फ खोजी गर्न बिहीबार बिहानै गएको महानगरपालिका जनस्वास्थ्य महाशाखाका प्रमुख कार्कीले बताए ।

नयाँ १३ जना थपिएसँगै विराटनगरमा कोरोना भाइरसबाट संक्रमित हुनेको संख्या १ सय ८३ पुगेको छ।