राजस्व अनुसन्धान बुटवलका प्रमुख पक्राउ, सुर्ती व्यापारीसँग दुई लाख घुस लिएको आरोप

भैरहवा– राजस्व अनुसन्धान कार्यालय बुटवलका प्रमुख विजय रानालाई सुर्ती व्यापारीसँग घुस लिंंदै गर्दा पक्राउ गरिएको अख्तियार अनुसन्धान आयोगले जनाएको छ।

रानालाई अख्तियार दुरुपयोग अनुसन्धान आयोग बुटवल कार्यालयले बुटवल–१३ बुद्धचोकबाट २ लाख रुपैयाँ घुससहित मंगलबार पक्राउ गरेको अख्तियार बुटवल कार्यालयका प्रमुख डा. भीष्मकुमार भुसालले जानकारी दिए।

हाल रानालाई नियन्त्रणमा लिएर अनुसन्धान थालिएको उनले बताए। भुसालका अनुसार रकम दिने व्यवसायी अनिलकुमार झालाई पनि पक्राउ गरेर अनुसन्धान सुरु गरिएको छ। रकम दिने झा सुर्ती, गुट्खा व्यवसायी हुन् ।

अख्तियारले रानाले झाबाट मासिक रुपमा घुस लिने गरेको दाबी गरेको छ।

राजस्व चुहावट तथा विदेशी विनिमय अपचलन सम्बन्धी कसुरमा अनुसन्धान, तहकिकात र अभियोजन गर्ने कामको जिम्मेवारी पाएको बुटवल कार्यालयका प्रमुख नै घुससहित पक्राउ परेको यो पहिलोपटक हो।