ओली–दाहाल छलफल बालुवाटारमा सुरु

काठमाडौं– पार्टीभित्र देखिएको विवाद समाधान गर्न नेकपाका दुई अध्यक्ष केपी शर्मा ओली र पुष्पकमल दाहालसहितका नेताहरुबीच बालुवाटारमा छलफल सुरू भएको छ।

प्रधानमन्त्रीका प्रेस सल्लाहकार सूर्य थापाले दुई अध्यक्षसहितका नेताहरुबीच छलफल सुरू भएको जानकारी दिए। छलफलमा वरिष्ठ नेता झलनाथ खनाल र संसदीय दलका उपनेता सुवास नेम्वाङ पनि सहभागी छन्।

आइतबारदेखि नेताहरुबीच पार्टीको विवाद समाधान गर्न निरन्तर छलफल भइरहेको छ। प्रधानमन्त्री एवम् पार्टी अध्यक्षसँग भेट्नुअघि आज अध्यक्ष पुष्पकमल दाहालले नेकपाका उपाध्यक्ष वामदेव गौतमसँग उनकै निवास भैंसेपाटीमा भेट गरेका थिए।

असार १० गतेदेखि सुरु भएको सत्तारुढ दल नेकपाको स्थायी कमिटी बैठकमा ओलीको राजीनामा माग भएपछि पार्टीभित्रको विवाद चुलिएको छ। त्यसयता पटक–पटक नेताहरुले एक्लाएक्लै र सामूहिक रुपमा छलफल गरे पनि सहमति हुन सकेको छैन।

पछिल्लो समय उपाध्यक्ष वामदेव गौतमले अघि सारेको ६ बुँदे प्रस्तावमाथी पनि छलफल चलिरहेको छ। नेकपाभित्र दाहाल–नेपाल र वरिष्ठ नेता झलनाथ खनालसहितको समूहले ओलीले कुनै एक पदबाट राजीनामा दिनुपर्ने माग गर्दै आइरहेको छ।

तर, ओलीले भने कुनै हालतमा आफूले एउटा पद पनि नछाड्ने अडान कायमै राखेका छन्।