ओली-दाहालसहितका नेताहरुबीच आज पनि छलफल हुने

काठमाडौं- सत्तारुढ दल नेकपाभित्रको विवाद समाधान गर्न आजपनि अध्यक्षद्वय केपीशर्मा ओली र पुष्पकमल दाहालसहितका नेताहरुबीच छलफल हुने भएको छ।

आइतबारदेखि नेताहरुबीच दिनहुँ छलफल भइरहे पनि कुनै सहमति जुट्न सकेको छैन् । बालुवाटार स्रोतका अनुसार आज बेलुका अध्यक्षद्वय र नेताहरुबीच छलफल हुन लागेको हो।

छलफलमा वरिष्ठ नेता झलनाथ खनाल र संसदीय दलका उपनेता सुवास नेम्बाङ पनि सहभागी हुनेछन्। १३ साउन देखि दुईअध्यक्षबीच रोकिएको संवाद आइतबारदेखि शुरु भएको हो। नेताहरु आ–आफ्नै अडानमा कायमै रहेका कारणले अहिलेसम्म सहमति बन्न सकेको छैन।

दाहाल–नेपाल ओलीलाई प्रधानमन्त्री वा अध्यक्षमध्ये कुनै एक पद छाड्न दबाब दिइरहेका छन्। तर, ओली भने कुनैपनि पदबाट राजीनामा नदिने अडानमा छन्।

आइतबार र सोमबार भएको छलफलमा अर्का अध्यक्ष दाहाल र वरिष्ठ नेता झलनाथ खनालले पार्टीभित्रको विवाद स्थायी कमिटी बैठकबाटै समाधान गर्नुपर्ने प्रस्ताव राखेका थिए।

तर, ओलीले भने स्थायी कमिटीको बैठकबाट नभई सचिवालयको बैठकबाट नै समाधान खोज्नुपर्ने बताएका थिए। १० असार देखि शुरू भएको नेकपाको स्थायी कमिटी बैठक पटक-पटक अवरुद्व हुँदै आएकाे छ।