आरडीटी परीक्षण बन्द गर्न मन्त्रालयको आग्रह

काठमाडौं- स्वास्थ्य तथा जनसंख्या मन्त्रालयले आरडीटी परीक्षण नगर्न सम्पूर्ण प्रदेश, स्थानीय तथा अस्पतालहरुलाई जानकारी गराएको छ।

हालसम्म कोरोना संक्रमितको पहिचानका लागि प्रयोग गरिँदै आएको आरडीटी किटको प्रयोग नगर्न मन्त्रालयले आग्रह गरेको हो।

आरडीटी किटबाट हालसम्म ३ लाख १२ हजार ४०२ नमुनाहरु परीक्षण गरिएको छ। आरडीटी परीक्षण राेक्नेबारे गत साउन १० गते नै मन्त्रालयस्तरीय निर्णय भएकाे थियाे।

मन्त्रालयले देशका विभिन्न स्थानका अस्पतालमा आकस्मिक सेवासहित अन्य सेवाहरु प्रभावित भएकाले उचित व्यवस्थापन गरी सेवा सञ्चालन गर्न मन्त्रालयले आग्रह गरेको छ।

स्वास्थ्य मन्त्रालयले कोभिड-१९ प्रभावित विरगञ्ज र जनकपुरमा स्वास्स्थ्य सेवा विभागका आवश्यक समन्वय गर्न स्वास्थ्य सेवा विभागका महानिर्देशक डा. दिपेन्द्ररमण सिंहको नेतृत्वमा उच्चस्तरीय टोली परिचालित गरेको छ।

अन्य स्थानमा पनि उच्चस्तरीय टोली परिचालन गरिएको प्रवक्ता गौतमले बताए।

मन्त्रालयले कोरोना संक्रमण बढ्दो क्रममा रहेकाले ६० वर्षमाथिका वृद्धवृद्धा तथा १२ वर्ष मुनिका बालबालिकालाई घरबाहिर ननिस्कन आग्रह पनि गरको छ।