श्रम अधिकृत प्रेम सञ्जेलमाथि कुटपिट गर्नेलाई अभद्र व्यवहारको मुद्दा

विराटनगरस्थित श्रम तथा सामाजिक सुरक्षा कार्यालयका प्रमुख उपसचिव प्रेमप्रसाद सञ्जेलमाथि कुटपिट गर्ने महिला कर्मचारीलाई अभद्र व्यवहारको कसुरमा कारबाही हुने भएको छ।

सञ्जेलमाथि शनिबार कार्यकक्षमै कुटपिट गर्ने दुई महिला कर्मचारी नेत्रा भट्टराई र मेनुका कोइरालामाथि अभद्र व्यवहारमा अनुसन्धान थालिएको प्रहरीले जनाएको छ।

जिल्ला प्रहरी कार्यालय मोरङका प्रमुख एसपी सन्तोष खड्काले सञ्जेलले दिएको जाहेरीअनुसार अभद्र व्यवहारमा मुद्दा दर्ता भएको जानकारी दिए।

दुवै महिलालाई आइतबार जिल्ला प्रशासन कार्यालय मोरङमा अभद्र व्यवहार कसुरको अनुसन्धानका लागि म्याद थप गर्न लगिएको खड्काले बताए।

ड्युटी खटाउने विषयमा विवाद हुँदा करार सेवाका महिला कर्मचारीले सञ्जेलमाथि कुटपिट गरेको खुलेको छ। सञ्जेलले पुरुष कर्मचारी सरह महिला कर्मचारीलाई पनि काममा खटाउन खोजेपछि आक्रमण भएको बुझिएको खड्काले बताए।

अभद्र व्यवहार कसुरमा प्रहरीले कसुर हेरेर १५ दिनसम्म हिरासतमा राखी प्रशासनमा मुद्दा बुझाउन सक्ने व्यवस्था छ।