सुदूरपश्चिम प्रदेशमा थप ५३ जनामा कोरोना संक्रमण पुष्टि

धनगढी- सुदूरपश्चिम प्रदेशमा आज थप ५३ जनामा कोरोना संक्रमण पुष्टि भएको छ।

धनगढीस्थित सेती प्रादेशिक अस्पतालको प्रयोगशालामा भएको परीक्षणमा कैलालीका ३० सहित सुदूरपश्चिममा ५३ जनामा कोरोना संक्रमण पुष्टि भएको हो।

उक्त प्रयोगशालमा पछिल्लो २४ घण्टामा दुई सय ८९ जनाको कोरोना परीक्षण भएको छ।

सेती प्रादेशिक अस्पतालका सूचना अधिकारी दिलिपकुमार श्रेष्ठका अनुसार कैलालीको गोदावरी नगरपालिकाका २७ र भजनी नगरपालिकाका तीन गरी ३० जनामा संक्रमण पुष्टि भएको छ। यस्तै, बझाङका २३ जनामा कोरोना संक्रमण पुष्टि भएको छ।

सूचना अधिकारी श्रेष्ठका अनुसार बझाङको थलारा गाउँपालिकाका १० जना, जयपृथ्वी नगरपालिकाका पाँच जना, दुर्गाथली र छब्बीसपाथिभेराका तीन–तीन जना र मष्टा गाउँपालिकाका दुई जनामा कोरोना संक्रमण पुष्टि भएको छ।

बझाङको मष्टा गाउँपालिकामा फेला परेकामा ६ वर्षीया बालिका र चार वर्षीय बालक रहेको सूचना अधिकारी श्रेष्ठले बताए।

यस्तै, थलारा गाउँपालिकामा फेला परेका १० जनामध्ये एक जना ९ वर्षीया बालिकासमेत रहेकी छिन्।