कालिकोटमा बाढीपहिरोबाट ३ दिनमा १२ जनाको मृत्यु, ७ जना बेपत्ता

सुर्खेत– अविरल वर्षापछि आएको बाढीपहिरोले कालिकोटमा वितण्डा मच्चाएको छ । बाढीपहिरोबाट तीन दिनमा १२ जनाको मृत्यु भएको छ । त्यस्तै ७ जना बेपत्ता भएका छन् ।

पहिरोले चार वटा घर बगाएको छ । जिल्ला प्रहरी कार्यालय कालिकोटका सूचना अधिकारी यक्षराज जोशीका अनुसार सोमबार राती रास्कोट वडा नं. १ मा पहिरोले जयबहादुर शाहीको घर बगाउँदा उनीसहित छोरीहरु संगिता, अस्मिता, कौशी र छोरा नविन शाही हालसम्म बेपत्ता छन् । प्रहरीका अनुसार जयबहादुरको एउटा खुुट्टामात्रै भेटिएको छ ।

त्यस्तै मंगलबार नै तीलागुफा नगरपालिका वडा नं. ८ का टाकुल्ला खोलाले बगाउँदा अविसरा शाही पनि बेपत्ता भएकी छिन् । खाँडाचक्र नगरपालिका वडा नं. ५ की शाही छोरीलाई भेटेर घर फर्कंदै गर्दा बाढीमा परी वेपत्ता भएकी हुन् ।

त्यस्तै साउन १२ गते (आइतबार) को खुलालुमा गएको पहिरोमा परी नगरहरिनाथ गाउँपालिका वडा नं. ८ का पारस भण्डारा पनि बेपत्ता भएका छन् । बुधबार दिँउसो गएको महाबै गाउँपालिकामा ७ का तुल महताराको घर पुरिँदा गणेश महतारा वेपत्ता भएका छन् । सोही घटनामा ७ वर्षीया संगीता भण्डारीको मृत्यु भएको छ । बेपत्ताहरुको खोजी भइरहेको प्रहरीले जनाएको छ ।

प्रहरीका अनुसार कालिकोटमा हालसम्म १२ जनाको मृत्यु भएको छ । बुधबार साँझ पहिरोले महावै गाउँपालिका–७ का तुल महत्तराको घर भत्किएर दुई जना बालबालिकाको मृत्यु भएको छ । घरको आँगनमा खेलिरहेका स्थानीय टेकबहादुर भण्डारीका ४ वर्षीया छोरी संगीता भण्डारी र सुर्ज महत्तराको १२ वर्षीय छोरो गणेश महत्तराको मृत्यु भएको हो ।

त्यस्तै मंगलबार राती नरहरिनाथ गाउँपालिका–४ भाटगाउँमा र वडा नं. ७ मा पहिरोले घर परिँदा ९ जनाको मृत्यु भएको हो । भाटगाउँमा पहिरोले घर पुरिँदा बाले बुढा र उनकी श्रीमति मुना बुढाको मृत्यु भएको छ । त्यस्तै वडा नं. ७ बागामा पहिरोले घर पुरिँदा घरमुली गंगे बुढा, उनकी श्रीमति ६१ वर्षीय श्रीमती नैना, २४ वर्षीय बुहारी कुशा, १८ वर्षीय छोरी विमला, १० वर्षीया नातिनी चन्द्रिका, ७ वर्षीय नाति राम बुढा र एक वर्षका चरित्र बुढाको मृत्यु भएको छ ।

६ जनाको घटनास्थलबाटै र घाइते भएकी विमलाको उपचारका क्रममा मृत्य भएको हो । त्यस्तै सोमबार रास्कोट नगपालिका १ चोक्टेबगरमा टेके टमटाको घर बगाउँदा घटनामा सान्नीत्रिवेणी गाउँपालिका–७ की केश्पुरा शाही मृत्यु भएको थियो ।