डिस्चार्ज भएका बिरामीमा कोरोना देखिएपछि बीपी स्वास्थ्य विज्ञान प्रतिष्ठान सिल

विराटनगर– सुनसरीस्थित धरानको बीपी कोइराला स्वास्थ्य विज्ञान प्रतिष्ठान सिल गरिएको छ।

प्रतिष्ठानका एक डाक्टरका श्रीमान् र डिस्चार्ज भएर घर गएका एक बिरामीमा कोरोना पोजेटिभ देखिएपछि प्रतिष्ठान सिल गरिएको हो।

प्रतिष्ठानका रजिष्ट्रार डा. मोहनचन्द्र रेग्मीका अनुसार लकडाउन प्रतिष्ठानको आवास क्षेत्रमा विशेषगरी केन्द्रित गरिएको छ भने ओपिडी, वार्डलगायत अस्पताल क्षेत्रमा सामाजिक दूरी कायम गर्न कडाइ गरिएको छ।

प्रतिष्ठानका रजिष्टार डा. रेग्मीले बुधबार सूचना जारी गर्दै आवास र छात्रवासमा बस्ने शिक्षक, कर्मचारीका परिवारलगायत विद्यार्थीहरुलाई अत्यावश्यक काममाबाहेक आफ्नो आवासबाहिर नजान निर्देशन दिएका छन्।

प्रतिष्ठानको हाताभित्रको खेल मैदान, सडक र अन्यत्र हिँडडुल गरेको पाइएमा कारबाही हुने पनि सूचनामा उल्लेख गरिएको छ।

प्रतिष्ठान बाहिर वा अन्यत्र स्थान वा जिल्ला जानुपरेमा पूर्वस्वीकृती लिएर मात्र जान भनिएको छ भने पूर्वस्वीकृती नलिएको पाइए कानुनबमोजिम कारबाही हुने चेतावनी दिइएको छ।