कोरोना परीक्षण र उपचारका लागि एक महिना पुग्ने स्वास्थ्य सामग्री मौज्दात

कोरोना भाइरस परीक्षण तथा उपचारका लागि एक महिनालाई पुग्ने स्वास्थ्य सामग्री मौज्दात रहेको स्वास्थ्य तथा जनसंख्या मन्त्रालयले जनाएको छ।

मन्त्रालयका प्रवक्ता डा. जागेश्वर गौतमले एक महिनालाई पुग्ने स्वास्थ्य सामग्री रहेको र थप आवश्यक स्वास्थ्य सामग्री ल्याउने तयारीमा रहेको बताए।

त्यसैगरी कोरोना संक्रमितको उपचार गरेबापत अस्पताललाई अनुदान दिने आदेश २०७७ स्वीकृत भएको समेत उनले जानकारी दिए । उक्त आदेशअनुसार सरकारले शंकास्पद तथा संक्रमित व्यक्तिहरुको उपचारबापत स्वास्थ्यकर्मी तथा अस्पताललाई रकम उपलब्ध गराउनेछ ।

लक्षण नभएका वा सामान्य लक्षण भएका बिरामीका लागि घरमा स्वास्थ्यकर्मीले निगरानी गर्दा लाग्ने खर्च प्रतिदिन प्रतिव्यक्ति रु. २०० को दरले दिइनेछ ।

लक्षण नभएका वा सामान्य लक्षण भएका आइसोलेसन केन्द्रमा भएका संक्रमितको लागि सम्बन्धित संस्थालाई रु. २ हजार, सामान्य लक्षण भएका वा ६० वर्षमाथिका जेष्ठ नागरिक, दिर्घरोगीको उपचारका लागि प्रतिदिन प्रतिव्यक्ति रु. ३ हजार ५०० रुपैयाँ सरकारले दिने भएको छ ।

त्यस्तै मध्यम जटिल उपचार गर्ने अस्पताललाई प्रतिदिन प्रतिव्यक्ति ७ हजार र जटिल प्रकृतिका बिरामी उपचार गर्ने अस्पतालका लागि प्रतिदिन प्रतिव्यक्ति १५ हजार दिने निर्णय भएको मन्त्रालयका प्रवक्ता डा. गौतमले जानकारी दिए । कोरोना परीक्षणको दायरा बढाउन मन्त्रालय लागिपरेको उनले बताए ।