हेडक्वार्टरका थप ४ प्रहरीमा कोरोना, देशभर २०६ संक्रमित

काठमाडौँ- प्रहरी प्रधान कार्यालय नक्सालमा कार्यरत थप ४ जना प्रहरीमा कोरोना संक्रमण पुष्टि भएको छ।

योसँगै प्रधान कार्यालयमा मात्रै संक्रमितको संख्या ३५ पुगेको छ भने देशभर २ सय ६ प्रहरीमा संक्रमण पुष्टि भएको छ ।

प्रहरी अस्पताल महाराजगञ्जमा गरिएको परीक्षणमा थप ४ जनामा संक्रमण पुष्टि भएको केन्द्रीय प्रहरी प्रवत्ता डीआइजी निरजबहादुर शाहीले जानकारी दिए । उनका अनुसार संक्रमितहरुलाई बलम्बुस्थित एपीएफ अस्पताल पठाइएको छ ।

संक्रमितहरु चालक र सञ्चारमा कार्यरतहरु रहेको डीआइजी शाहीले बताए । आइतबार, सोमबार र मंगल ३१ जनामा संक्रमण देखिएको थियो ।

संक्रमितको संख्या बढ्दै गएपछि प्रहरी प्रधान कार्यालयमा कार्यरत प्रहरीहरु त्रसित बनेका छन् । बाहिरी मानिसको आउजाउमा कडा पारिएको छ भने अत्यावश्यक काममा आउनेलाई आवश्यक सुरक्षा मापदण्ड अपनाएर मात्रै प्रवेश गर्न दिइएको छ ।