पहिराेको जोखिमपछि चन्द्रागिरिका तीन घर सुरक्षित स्थानमा सारियो

काठमाडौं– काठमाडौंको चन्द्रागिरि नगरपालिका–१३ मा तीन घरमा पहिराेले जोखिम पुर्‍याएपछि सुरक्षित स्थानमा सारिएको छ।

केही दिनअगाडि परेको अविरल वर्षाबाट वडा नं १३ को बोगटीगाउँमा तीन घरलाई पहिराेको जोखिम बढाएपछि ती घर सुरक्षित स्थानमा स्थानान्तरण गरिएको हो।

पछिल्लो समय बाढीपहिराका कारण देशैभरि ठूलो जनधनको क्षति पुर्‍याइरहेका बेलामा चन्द्रागिरिमा हुनसक्ने बाढीपहिराेको सम्भावित घटनालाई रोक्न नेपाली सेनाको युद्ध कवच गण सीतापाइलाबाट गएको टोलीले सुरक्षित स्थानमा स्थानान्तरण गरेको हो।

बोगटी गाउँमा सीता रिजाल, पुष्पराज गिरी र तेजकुमारी पौडेलको घरमा पहिराले जोखिम पुर्‍याएपछि स्थानान्तरण गरिएको हो। सेनाको टोलीले तीनै घरको खाद्यान्न लत्ताकपडा झिकेर सुरक्षित स्थानमा सारेको छ।

नगरपालिकाका प्रवक्ता हरिभक्त महर्जनले पहिराको जोखिममा परेका परिवारलाई अस्थायी रुपमा बस्नका लागि त्रिपाल राखेर घर बनाइएको जानकारी दिए।

पछिल्लो समय नगरपालिकाले विपद्बाट हुने सम्भावित घटना रोक्न विपद् व्यवस्थापनको क्षेत्रमा यथेष्ट रकम विनियोजन गरी काम गर्दै आइरहेको छ। -रासस