कांग्रेस पार्टी कार्यालयमै बोलायो पौडेल पक्षले भेला

काठमाडौं- नेपाली कांग्रेसका बरिष्ठ नेता रामचन्द्र पौडेलले आफू निकटका केन्द्रीय सदस्यहरुको भेला बोलाएका छन्।

आज (बुधबार) दिउँसो २ बजे सानेपास्थित पार्टी कार्यालयमा केन्द्रीय सदस्यहरुको भेला बोलाएका हुन्। उनी निकट एक केन्द्रीय सदस्यले समसामयिक विषयमा छलफल गर्न भेला बोलाइएको जानकारी दिए।

‘दिउँसो २ बजे भेला भनेर खबर आएको छ,’ उनले भने, ‘पार्टीको महाधिवेशन लगायतका विषयमा नै छलफल हुन्छ होला।’ पौडेलले नै सबै केन्द्रीय सदस्यहरुलाई खबर गरेर डाकेका हुन्।

नेपाली कांग्रेसको आसन्न १४ औं महाधिवेशनको कार्यतालिका प्रकाशित भइसकेपछि सभापति शेरबहादुर देउवाले विभिन्न विभाग र संरचना विस्तार गरेपछि पौडेल पक्ष रुष्ट बनेको छ।

सोमबार साँझ उपत्यकामा उपलब्ध जिल्ला सभापतिहरुको भेलाले पनि महाधिवेशनको कार्यतालिका सार्वजनिक भइसकेपछि गठन गरिएका विभाग र संरचना खारेज हुनुपर्ने माग गरेका थिए।