वीरगन्जमा सेना, प्रहरी र कैदीसहित थप ३४ मा काेराेना पुष्टि

वीरगन्ज- पर्सामा सेना, प्रहरी र कैदीबन्दीसहित थप ३४ जनामा कोरोना भाइरस संक्रमण पुष्टि भएको छ।

नारायणी अस्पतालको पीसीआर प्रयोगशालामा गरिएको परीक्षणमा २ देखि ६५ वर्ष उमेरका ३४ जनामा कोरोना पुष्टि भएको नारायणी अस्पतालका प्रमुख मेडिकल सुपरिटेन्डेन्ट डा. मदन उपाध्यायले जानकारी दिए।

संक्रमितमध्ये पाँच बालबालिका, १० महिला र १९ पुरुष छन्।

नेपाली सेनाका एक, नेपाल प्रहरीका तीन, कैदीबन्दी ६, कारागारका कर्मचारी दुई, स्वास्थ्यकर्मी एक र आफैंले पैसा तिरेर पीसीआर परीक्षण गराएका एक जनामा कोरोना संक्रमण देखिएको डा‍. उपाध्यायले बताए।

संक्रमितमध्ये २० जना वीरगन्जकै छन्। वीरगन्ज महानगरपालिकाका वडा नं ४, ५, ९, ११ श्रीपुर, आदर्शनगर, बेल्वा, भिस्वा, सिर्सियाका बासिन्दामा संक्रमण देखिएको हो 

वीरगन्जमा समुदाय स्तरमा संक्रमण फैलिएको भन्दै स्थानीय चिन्तित भएका छन्। यसअघि नै ४८ जना संक्रमितले अस्पतालमा शय्या खाली नभएपछि भर्ना पाएका छैनन्।