प्रदेश १ मा ४ नर्ससहित २३ जना कोरोना संक्रमित थपिए

विराटनगर– प्रदेश १ मा सोमबार २३ जना कोरोना संक्रमित थपिएका छन् ।

मोरङमा १९, झापामा २, पाँचथर र धनकुटामा १–१ जनामा संक्रमण देखिएको सामाजिक विकास मन्त्रालयले जनाएको छ ।

मोरङको विराटनगरमा ५ महिला, २ पुरुष, रतुवामाईमा १२ पुरुष, झापाको बाह्रदशीमा २ पुरुष, पाँचथरको याङवरक र धनकुटाको महालक्ष्मीमा १–१ पुरुषको रिपोर्ट पोजेटिभ आएको मन्त्रालयले जनाएको छ । प्रदेश १ मा कोरोना संक्रमणको संख्या ९ सय ४५ पुगेको छ । प्रदेश १ बाट ७ सय ४७ जना डिस्चार्ज भइसकेका छन् ।

प्रदेश १ मा सोमबार ५ सय १८ जनाको पीसीआर परीक्षण गरिएको छ । प्रदेश १ मा आज सम्म ४० हजार १८ जनाको पीसीआर परीक्षण भएको सामाजिक विकास मन्त्रालयका प्रवक्ता डा. सुरेश मेहताले बताए ।

विराट नर्सिङ होमका ४ नर्स संक्रमित

विराट नर्सिङ होम (विराटनगर अस्पताल) मा कार्यरत चार जना स्वास्थ्यकर्मीमा कोरोना संक्रमण देखिएको छ । विराटनगरमा सोमबार पुष्टि भएका ७ संक्रमित मध्ये ४ जना विराट नर्सिङ होममा कार्यरत नर्स हुन् ।

यसअघि सो नर्सिङ होमका सञ्चालकमा कोरोना संक्रमण पुष्टि भएको थियो । उनको अहिले काठमाडौंमा उपचार भईरहेको छ ।

कोशी अस्पतालको एक वार्ड सिल

कोशी अस्पताल विराटनगरमा कार्यरत एक डाक्टर र एक नर्समा कोरोना संक्रमण पुष्टि भएपछि अस्पतालको ‘पोस्टनेटल वार्ड’ सिल गरिएको छ । आइतबार रातिदेखि कोशीकोे पोस्टनेटल वार्ड सिल गरी संक्रमित नर्सको सम्पर्कमा रहेकाहरूको स्वाव संकलन सुरू गरिएको कोशी अस्पतालका मेडिकल सुपरिटेण्डेन्ट डा.चुमनलाल दासले जानकारी दिए ।

प्रदेश १ का कुन जिल्लामा कति ?

प्रदेश १ को झापा जिल्लामा सवैभन्दा बढी कोरोना संक्रमण देखिएको छ । झापामा ३ सय ४१, मोरङमा २ सय ६६, सुनसरीमा १ सय २७, उदयपुरमा ८६, इलाममा ३५, ओखलढुङ्गा र धनकुटामा १६–१६, खोटाङमा १२, ताप्लेजुङमा ११, तेह्रथुममा ८, पाँचथरमा ७, भोजपुरमा ६, सोलुखुम्वु र संखुवासभामा ५–५, प्रदेश १ बाहेकका जिल्लाका ४ जना गरी संक्रमितको संख्या ९ सय ४५ पुगेको छ ।