लकडाउनमा पनि पोखरा अन्तर्राष्ट्रिय विमानस्थलको काम धमाधम, समयमै सक्ने लक्ष्य

पोखरा– राष्ट्रिय गौरवको परियोजना पोखरा अन्तर्राष्ट्रिय विमानस्थल निर्माणको काम धमाधम चलिरहेको छ ।

चिनियाँ निर्माण कम्पनी सीएमसीईले ११ अगस्ट २०१७ बाट निर्माण कार्य सुरु गरेको विमानस्थल निर्माणको काम ६२ प्रतिशत सकिएको आयोजनाले जनाएको छ ।

सन् २०२१ जुलाई १० मा विमानस्थल निर्माण कार्य सम्पन्न गरी नेपाल सरकारलाई हस्तान्तरण गर्ने सम्झौताअनुरुप काम भइरहेको आयोजना प्रमुख विनेश मुनकर्मीले जानकारी दिए । उनका अनुसार विमानस्थलमा हाल १४ वटा भवन बनिरहेका छन् । भवन फिनिसिङको काम बाँकी रहेको आयोजना प्रमुख मुनकर्मीले बताए ।

कोरोना महामारीका बेलासमेत सुरक्षाका उपाय अपनाउँदै काम भइरहेको छ । चीनको एक्जिम बैंकको करिब २२ अर्ब रुपैयाँ ऋणमा बनिरहेको विमानस्थलको ट्याक्सी पार्क, ह्याङ्गर, राजमार्गदेखि टर्मिनल भवनसम्मको पहुँच मार्ग लगायतको काम सकिएको मुनकर्मीले बताए ।

कोरोना महामारीका कारण विमानस्थलको निर्माण कार्यमा समेत भने परेको छ ।

‘लकडाउनअघि घर गएका चिनियाँ कामदार आउन पाएनन्। मार्चमा १०७ जना कामदार भने ल्याइएको थियो। विमानस्थलको काम हुँदैगर्दा कोरोना भाइरसको त्रासका कारण नेपालमा विमानस्थल र नाकाहरु बन्द भए । यसले गर्दा आवश्यक सामान ल्याउन सकेनौं । थप कामदार समेत आउन सकेनन् । त्यसैले भनेजस्तो काम सुचारु हुन सकेन,’ उनले भने, ‘अहिले भारतमा लकडाउनको अवस्था केही सहज भएपछि नाकामा रोकिएको सामान आएको छ । काम पनि सुचारु भइरहेको छ । केरुङमा रोकिएको सामान समेत आएको खण्डमा विमानस्थलको काम समयमै सकिन्छ ।’

लकडाउन खुले पनि विमानस्थल निर्माणमा भने प्रभाव परेको उनले बताए । ‘चीनबाट कुनै पनि सामान पोखरा ल्याउँदा दुई महिना लाग्ने हुँदा समस्या भइरहेको छ । निर्माण व्यवसायीलाई कामदारको संख्यामा वृद्धि गर्न र सामानसमेत ल्याउने व्यवस्था मिलाउन आग्रह गरिएको छ,’ मुनकर्मीले जानकारी दिए ।

वर्षाका कारण अहिले भित्री काम भइरहेको जानकारी दिँदै मुनकर्मीले कामदारको संख्या र काम गर्ने समय बढाएर निर्धारित समयमै विमानस्थलको काम सक्ने योजना रहेको सुनाए।

पोखरा क्षेत्रीय विमानस्थल निर्माणमा हाल सय जना नेपाली कामदारले काम गरिरहेका छन् भने २४४ चिनियाँ कामदार खटिएका छन् ।

आयोजना प्रमुख मुनकर्मीका अनुसार पोखरा अन्तर्राष्ट्रिय विमानस्थलमा न्यारोबडी जहाजमात्र अवतरण गर्न सक्नेछन् । विमानस्थलमा १६० सिटदेखि १९० सिटसम्मका हवाईजहाज अवतरण गर्न सक्ने उनले बताए । एयरबस ३१९, एयरबस ३२०, बोइङ ७५७ लगायत जहाजहरु यो विमानस्थलमा अवतरण हुन सक्छन् ।

पोखरा विमानस्थल निर्माणका लागि ९७ प्रतिशत जग्गा प्राप्त भइसकेको मुनकर्मीले बताए । पहिले स्थानीयबाट जग्गा अधिकरणको समस्या भए पनि अहिले नभएको उनले जानकारी दिए ।

पोखरा महानगरपालिका, जिल्ला प्रशासन कार्यालय र स्थानीयको उपस्थितिमा पटकपटक छलफल गरेर समस्या टरेको उनले बताए । ६ महिनाभित्र अधिग्रहणको काम सकेर बाँकी रहेको जग्गामा समेत विमानस्थलको निर्माण कार्य सुचारु गर्ने उनको भनाइ छ ।