भारतमा कोरोनाबाट एकै दिनमा ५० हजार संक्रमित, ब्राजिलमा भन्दा दोब्बर !

काठमाडौं- तिब्र गतिमा फैलिएको कोरोना भाइरसबाट भारतमा एकै दिनमा आइतबार ५० हजार ५ सयभन्दा धेरेमा कोरोना संक्रमण पुष्टि भएको छ ।

दिनहुँ संक्रमणदर तिब्र गतिमा बढेको भारतमा एकै दिनमा यति धेरै संक्रमित थपिएको यो पहिलो पटक हो । यसअघि शनिबार ४८ हजार ४ सय ७२ जनामा संक्रमण पुष्टि भएको थियो भने शुक्रबार ४८ हजार ८ सय ९२ जना संक्रमित थपिएका थिए ।

भारतमा पछिल्लो २४ घण्टामा थपिएका संक्रमितको संंख्या ब्राजिलमा एकै दिनमा थपिएका संक्रमितको संख्याभन्दा दोब्बरले बढि छ। ब्राजिलमा पछिल्लो २४ घण्टामा २३ हजार ४ सय ६७ जनामा संक्रमण पुष्टि हुँदा भारतमा ५० हजार ५ सय २५ जना संक्रमित थपिएका छन् ।

लकडाउन खुलेसँगै भारतमा संक्रमण दर तिब्र गतिमा फैलिएको छ भने मृत्युदर पनि बढेको छ । पछिल्लो २४ घण्टामा भारतमा कोरोनाबाट ७ सय १६ जनाको मृत्यु भएको छ ।

अहिलेसम्म भारतमा कोरोनाबाट १४ लाख ३६ हजारमा संक्रमण पुष्टि हुँदा ३२ हजार ८ सय १२ जनाको मृत्यु भएको छ ।