पर्सामा आइसोलेसन अभाव, २८ जना कोरोना संक्रमित घरमै

पर्सा- नयाँ संक्रमित थपिएसँगै पर्सामा आइसोलेसन अभाव देखिएको छ।

आइसोलेसन अभाव भएपछि नयाँ संक्रमितलाई कहाँ राख्ने भन्नेबारे अन्योल भएको गण्डक कोभिड अस्थायी अस्पतालका चिकित्सक बताउँछन्।

पछिल्लो पटक पर्सामा ७ स्वास्थ्यकर्मीसहित १९ जनामा कोरोना संक्रमण देखिएको छ। थपिएका संक्रमितमध्ये पर्सागढी क्वारेन्टिनमा खटिएका दुई महिला र तीन पुरूष स्वास्थ्यकर्मी छन्। यस्तै, नारायणी अस्पताल र गण्डक कोभिड अस्थायी अस्पतालका १/१ जना स्वास्थ्यकर्मीमा पनि कोरोना संक्रमण देखिएको छ।

स्थानीय संक्रमितमध्ये वीरगन्ज-६, माइस्थानका ३, बहुअरी-१४ का २, तथा राधेमाइ-११, छपकैया-२, मिथिलानगर-१६, आददर्शनगर-१० र पर्सागढीका १/१ जना छन्। तीमध्ये ९ जनाले पैसा तिरेर पीसीआर परीक्षण गराएको नारायणी अस्पतालले जनाएको छ।

समुदायमा कोरोना संक्रमण फैलिएको भन्दै निषेधाज्ञा जारी भएका बेला नयाँ संक्रमित फेला परेका हुन्। उनीहरुको साउन ७, ८, ९ र १० गते पीसीआर परीक्षणका लागि स्वाब संकलन गरिएको थियो। 

वीरगन्जमा २८ संक्रमित घरमै छन् भने ५४ जना गण्डक कोभिड अस्पतालमा उपचाररत छन्।