गण्डकीमा कस्तो छ कोरोनाको अवस्था ?

पोखरा– गण्डकी प्रदेशमा कोरोना भाइरस (कोभिड–१९) संक्रमणको अवस्था सामान्यतर्फ गइरहेको सरकारी अधिकारीहरुले बताएका छन् ।

अहिलेसम्म प्रदेशमा १ हजार ३ सय ७२ जना कोरोना संक्रमित छन्, जसमा १ हजार २ सय ६ जना पुरुष र १ सय ६६ जना महिला छन् ।

संक्रमितमध्ये १ हजार १ सय ४८ जना निको भएर घर फर्किसकेका छन् । अहिले प्रदेशमा सक्रिय संक्रमितको संख्या २ सय २० जना मात्र छन् । त्यसैगरी अहिलेसम्म आइसोलेसनमा २०८ जना छन् भने आईसियु तथा भेन्टिलेटरमा १ जना पनि नरहेको प्रदेश स्वास्थ्य निर्देशनालय गण्डकीले जनाएको छ । निर्देशनालयका अनुसार कोरोनाबाट प्रदेशमा ४ जनाको मृत्यु भइसकेको छ । जसमा बागलुङका १, स्याङ्जाका २ र गोर्खाका १ जना छन् ।

प्रदेशमा कोराना संक्रमणको अवस्था अरु जिल्लाको तुलनामा निकै सुधारोन्मुख रहेको प्रदेश स्वास्थ्य निर्देशनालय गण्डकीका निर्देशक डा. विनोद विन्दु शर्मा बताउँछन् ।

उनी भन्छन्, ‘कोरोनाको अवस्था गण्डकी प्रदेशमा निकै राम्रो छ । संक्रमितहरु निको हुने अवस्थामा छन् । पछिल्लो समयमा संक्रमितहरु आईसियुमा लानुपर्ने अवस्था सिर्जना भएको छैन ।’ समुदायबाट संक्रमण फैलिएमा भयावह स्थिति आउनसक्ने हुँदा समुदायमा फैलन नदिन निर्देशनालयले विभिन्न कदम चाली फैलन नदिएको निर्देशक शर्मा दावी गर्छन् ।

क्वारेन्टिन, आइसोलेसन, संक्रमितसँगको सम्पर्कमा रहेकाको पनि निरन्तर परीक्षण गरिरहेको डा. शर्माले बताए । त्यस्तै संक्रमण हुन सक्ने समुदाय स्तरमा पनि परीक्षण भैरहेको उनले जानकारी दिए ।

उनले भने, ‘सम्भावित क्षेत्र पोखराका ६ वटा तरकारी पसलहरुबाट ३२ जनाको स्याम्पल लिइसकेका छौं । त्यस्तै महानगरपालिकाका सरसफाइकर्मी, अस्पतालका स्वास्थ्यकर्मी र केही रिपोर्टरहरुको परीक्षण गरिसकेका छौं ।’

क्वारेन्टिनको अवस्था अरु प्रदेशभन्दा कम नभएको उनी दावी गर्छन् । उनी भन्छन्, ‘आइसोलेसनको अवस्था पनि धेरै राम्रो छ । सरकारले ३ वटा डेडिकेटेड अस्पताल तोके पनि हामीले ३५ वटा थपेर ३८ वटा पुर्याएका छौं । यो सबै अवस्था हेर्दा गण्डकी प्रदेशमा कोरानाको अवस्था एकदमै राम्रो छ ।’

अरु प्रदेशभन्दा गण्डकीमा कोरोनाको अवस्था हेर्दा निकै सुधार भएको डा. शर्मा दावी गर्छन् । अहिले ल्यावमा ३ वटा मेसिनबाट परीक्षणको काम भइरहेको छ भने एउटा मेशिन छिट्टै थप गर्ने तयारीमा रहेको प्रदेश स्वास्थ्य निर्देशनालयले जनाएको छ ।