नारायणकाजी भन्छन्– ‘हद भयो, असह्य भयो, न्याय स्थापित होस्’

काठमाडौं– सत्तारुढ दल नेकपाका प्रवक्ता नारायणकाजी श्रेष्ठले न्यायालय, सिङ्गो राज्य प्रणाली र व्यवस्थामाथि नै प्रश्न उठ्न थालेको भन्दै जनआवाजलाई सम्बोधन गर्न माग गरेका छन।

‘के हुँदैछ यस्तो? न्यायालय र सिङ्गै राज्य प्रणाली र व्यवस्थामाथि नै प्रश्न उठ्ने गरी न्यायालयद्वारा निर्णय किन गरिदैछ?,’ उनले समाजिक सञ्जालमा लेखका छन, ‘बास र छाक टार्ने समस्याबाट पीडीत गरीब चेपाङ युवाको हत्या संवेदनशील सुरक्षा अङ्गबाट नै दर्दनाक ढङ्गले पिटीपिटी किन गरिन्छ र सुकुम्बासी झुप्रामा आगो किन लगाईन्छ?’

उनले रुकुम घटनालाई इंगित गर्दै भनेका छन्, ‘कथित दलित भएकै आधारमा बर्बर सामूहिक हत्या किन गरिन्छ? हदभयो, असह्य भयो। न्याय स्थापित होस् र दोषीमाथि कार्वाही होस््।’

उनले अगाडि भनेका छन्, ‘यो अवाजलाई समयमै सम्बोधन गरौं अन्यथा निराशा, आक्रोश, अनिश्चय र तरलताको परिणाम के होला? समयमै सबैले सोचौं। परिणाम सधैं सकारात्मक नै हुन्छ भन्न सकिन्न।’

राज्यका अङ्गहरुको लोकतन्त्र अनुरुप पुनर्संरचना गरी लोकतन्त्रको व्यवहारिक अभ्यास र विकास गरिनुपर्ने पनि उनले बताएका छन्।