कोरोनाबाट विदेशमा ११६ नेपालीको मृत्यु

काठमाडौं- विश्वव्यापी महामारीका रुपमा फैलिरहेको कोरोना भाइरसबाट विदेशमा रहेका १ सय १६ नेपालीको मृत्यु भएको छ ।

यो साता वेलायतमा थप एक जना नेपालीको मृत्यु भएसँगै मृतकको संख्या १ सय १६ पुगेको गैरआवासीय नेपाली संघ अन्तर्गतको स्वास्थ्य समितिले जनाएको छ ।

समितिका अनुसार अनुसार ३६ मुलुकमा रहेका ३१ हजार १ सय ५० कुल संक्रमित मध्ये २९ हजार २ सय ४३ जना अर्थात ९३ प्रतिशत भन्दा बढी नेपालीहरु कोरोना संक्रमणमुक्त भएका छन्।

यो साता अफ्रिकी मुलुकसँगै यूएई, कतार, कुवेत र साउदी अरबमा रहेका नेपालीमा पनि संक्रमण बढेको गैरआवासीय नेपाली संघ अन्तर्गतको स्वास्थ्य समितिले जनाएको छ ।

विदेशमा अझै ९४ नेपालीको शव अलपत्र

विविध कारणले परदेशमा ज्यान गुमाएका नेपालीमध्ये अझै ९४ नेपालीको शव विदेशमै अलपत्र परेको छ । वैदेशिक रोजगारीमा गएर ज्यान गुमाएका २ सय १६ नेपालीको शव सरकारले लकडाउनपछि नेपाल ल्याएको छ ।

मलेसिया, साउदी, कतार, युएई, कुवेत, बहराइन, ओमान, दक्षिण कोरिया लगायतका देशबाट यो सातासम्म २ सय १६ वटा शव नेपाल ल्याएरपरिवारलाई बुझाइएको छ ।

विदेशमा विभिन्न कारण ज्यान गुमाएका ४ सय ७४ जनामध्ये १ सय ६५ जनाको परिवारको सहमतिमा गन्तव्य मुलुकमा अन्त्येष्टि गरिएको छ । ९४ नेपालीको शव भने नेपाल ल्याउन खोजिए पनि अझै ल्याउन नसकिएको गैरआवासीय नेपाली संघले जनाएको छ ।