विराटनगरमा गाडी चले, तर यात्रु आएनन्

विराटनगर– चार महिनापछि यात्रुवाहक बस सञ्चालनमा आए पनि यात्रु नहुँदा यातायात व्यवसायीलाई समस्या भएको छ। साउन ७ गतेदेखि लकडाउन खुलेसँगै विराटनगर बसपार्कबाट छोटो दूरीका सवारीसाधन सञ्चालनमा आएका छन् ।

तर, यात्रु नआउँदा बस सञ्चालन गर्ने कि बन्द गर्ने अवस्था भएको यातायात व्यवसायीले बताएका छन्। विराटनर बसपार्कबाट तीन दिनमा ५ दर्जन बढी बस सञ्चालनमा आएको जिल्ला ट्राफिक प्रहरी कार्यालय मोरङले बताएको छ।

विराटनगर बसपार्कबाट मोरङ र सुनसरीका विभिन्न ठाउँमा चल्ने छोटो दूरीका सवारीसाधन यात्रु लिएर गन्तव्यतर्फ गएको ट्राफिक प्रहरी कैलाश मगरले बताए ।

यात्रुबस सञ्चालनमा आए पनि यात्रुको संख्या न्यून छ । पहिलेको तुलनामा कम यात्रु भएको बस चालक भुपाल लिम्बुले बताए। उनका अनुसार बसपार्कमा १० देखि १५ मिनेटको फरकमा बल्ल एकजना यात्रु आउने गरेका छन् । उनले भने, ‘यात्रुहरु बसपार्कमा पनि आउँदैनन्, बाटामा चढ्ने पनि कम छन् ।’

सामान्य अवस्थामा विराटनगर बसपार्कबाट दैनिक ३ सयदेखि साढे ३ सय बस देशका विभिन्न भागका लागि छुट्ने गरेको नेपाल ट्रेड युनियन महासंघ (जिफन्ट) का प्रदेश १ संयोजक किशोर धमलाले बताए ।

उनका अनुसार विराटनगर बसपार्कबाट अहिले दैनिक २–३ वटा बस छुट्ने गरेका छन् । जिल्ला प्रशासन कार्यालय मोरङ र सुनसरीको अनुमतिमा २ जिल्लामा मात्र बस जाने गरेको उनले बताए । पूर्णरुपमा अवस्था सामान्य नहुँदासम्म यात्रु नआउने उनले बताए ।

पहिलेको भन्दा ५० प्रतिशत बढी भाडा लिएर सरकारले सञ्चालन गर्न दिएअनुसार भाडा बृद्धि भएकाले पनि यात्रु घटेको जिफन्ट संयोजक धमलाले बताए ।

३० जना सिट क्षमता भएका गाडीमा १५ देखि १८ जनासम्म यात्रु ओसारपसार गर्ने गरिएको व्यवसायीले बताएका छन् । गाडीमा सामाजिक दूरी कायम गरेर यात्रुहरु राख्ने गरेको धरान–विराटनगरका बुकिङ सहायक लालबाबु झाले बताए ।