गृहमन्त्री भन्छन्– अव्यवस्थित बसोबासकै कारण जनधनको बढी क्षति

काठमाडौं– गृहमन्त्री रामबहादुर थापाले अव्यवस्थित बसोबासकै कारण विपद्का कारण हरेक वर्ष जनधनको क्षति भइरहेको बताएका छन्।

आज गृह मन्त्रालयमा राष्ट्रिय विपद् जोखिम न्यूनीकरण तथा व्यवस्थापन प्राधिकरण कार्यकारी समितिको बैठकमा उनले विपद्बाट हुने क्षति रोक्ने खालका नीति कार्यान्वयनमा जोड दिनुपर्ने धारणा राखे।

‘हरेक वर्ष जनधनको क्षति भइरहेको छ। त्यसको न्यूनीकरण र निवारण गर्ने योजना बनाउनु जरुरी छ,’ उनले भने, ‘विकसित मुलुकमा पनि समस्या आउँछ तर हाम्रोजस्तो मुलुकमा अझ बढी क्षति गर्दै आइरहेको छ।’

उनले विकासको नीति डोजरमा केन्द्रित रहेको भन्दै हामीले अहिले अवलम्बन गरिरहेका नीतिकै कारण बढी क्षति व्यहोर्नु परिरहेको बताए।

‘भूकम्प प्रतिरोधात्मक घर नबन्दा त्यसले असर गर्छ। बाढीपहिरो जाने ठाउँमा बस्ति हुनु हुँदैन भन्नेतर्फ ध्यान गएको छैन,’ उनले भने, ‘अब योजना तथा कार्यक्रम गर्दा यसतर्फ पनि ध्यान दिनु जरुरी छ।’

विपद् रोक्ने खालका नीति अवलम्बन गर्नुपर्ने भन्दै उनले प्राकृतिक प्रकोप रोक्न नसकिने विषय भएकाले त्यसबाट हुने क्षतिको न्यूनीकरण कसरी गर्ने भन्ने योजनालाई व्यवहारमा लागू गरिनुपर्ने धारणा राखे।

‘अहिले प्राकृतिक प्रकोपबाट हुने क्षति न्यूनीकरण गर्दै त गइरहेका छौं। तर, त्यतिले मात्रै पुग्दैन । त्यसका लागि अझ आवश्यक तयारी गर्नुपर्छ,’ उनले भने, ‘बजेटलाई ठिक ढंगले परिचालन गर्ने, बस्ति स्थानान्तरण गर्नेदेखि सही ढंगले कार्यान्वयन गर्नेतर्फ ध्यान जानुपर्छ।’

उनले योजना कार्यान्वयनमा थुप्रै कमीकमजोरी रहेको भन्दै ती सच्चाएर अघि बढ्नुपर्ने बताए।

गृहमन्त्री थापाले अर्को बैठकमा विपद्ले गरेको क्षतिको विवरण र विपद् भएका क्षेत्रमा पुनर्निर्माणको योजना, कार्यक्रम र बजेटको खाकासहित आउन समितिका सदस्यहरुलाई निर्देशन पनि दिए।

बैठकमा मन्त्रीहरु भानुभक्त ढकाल, हृदयेश त्रिपाठी, राज्यमन्त्री रामविर मानन्धर, विभिन्न मन्त्रालयका सचिव, सुरक्षा निकायका प्रमुखहरुको सहभागिता थियो।