कोरोना रोकथामका लागि विशेष रणनीति बनाउन प्रधानमन्त्रीलाई देउवाको सुझाव

काठमाडौं- नेपाली कांग्रेसका सभापति शेरबहादुर देउवाले कोरोना भाइरस र बाढीले पुर्‍याएकाे क्षतिबारे प्रधानमन्त्री केपी शर्मा ओलीको ध्यानाकर्षण गराएका छन्।

बालुवाटारमा बिहीबार बिहान भएको भेटमा देउवाले कोरोना रोकथामका लागि विशेष रणनीति निर्माण गर्न ओलीलार्ई सुझावसमेत दिएका छन्।

कोरोना जोखिम कायमै रहँदा एक सय २० दिन लामो लकडाउन खुलेपछिको चुनौती सामना गर्न नयाँ र विशेष रणनीति निर्माण गर्नुपर्ने सुझाव देउवाकाे छ।

लकडाउन भए पनि संक्रमितको संख्या २० हजार पुग्न लागेको र ४३ जनाको मृत्यु भएको स्थितिमा लकडाउन खुलेपछि जोखिम थप बढ्ने देउवाले बताए।

कोरोनाको परीक्षण पीसीआर विधिबाट मात्रै गर्न पनि देउवाले सुझाव दिए। क्वारेन्टिनहरु अझै पनि मापदण्डयुक्त बनाउन सरकारले ध्यान नदिएकोमा देउवाले आपत्ति प्रकट गरे।

कोरोनाबाट सिर्जित चुनौतीका कारण उब्जिएका विभिन्न क्षेत्रका असन्तुष्टि र आन्दोलनले अघि सारेका जायज माग गम्भीरतापूर्वक लिएर सम्बोधन गर्न पनि देउवाले ओलीको ध्यानाकर्षण गराए।

विदेशमा अप्ठ्यारोमा परेका नेपालीलाई उद्धार गर्ने कार्यमा तिव्रता दिन पनि देउवाले सुझाव दिएका छन्।

बाढी र पहिरोमा परेर देशका विभिन्न स्थानमा कयौँको मृत्यु, कयौँ बेपत्ता र सयौं घरबारविहीन भएको हुँदा सरकारले उद्धार, राहत र पुनःस्थापनाको काम युद्धस्तरमा गर्नुपर्ने देउवाले औँल्याएका छन्।