किर्ते गरी अर्काको जग्गा बिक्री गर्ने पक्राउ

काठमाडौं- सरकारी छाप दस्तखत किर्ते र ठगी मुद्दामा अदालतबाट सजाय सुनाइएका फरार अभियुक्त पक्राउ परेका छन्। 

उच्च अदालत पाटनले २०७० चैत १७ मा दुई वर्ष कैद र साढे ३७ लाख जरिवानाको फैसला सुनाएका ललितपुर महांकाल–२ का ४३ वर्षीय हरिशरण महतलाई प्रहरीले पक्राउ गरेको हो।

प्रहरीको केन्द्रीय अनुसन्धान ब्युरोको टोलीले महतलाई सातदोबाटोमा लुकिछिपी बसेको अवस्थामा पक्राउ गरेको जनाएको छ।

महतले लोप्साङ लामा र उनकी पत्नी च्युङ्ताङ् लामाका नाममा रहेको साबिक काठमाडौं सीतापाइला–९, हाल नागार्जुन–५ स्थित दुई रोपनी जग्गा मालपोत कार्यालय कलंकीका खरिदार भीमबहादुर राईसँग मिलेर अर्कैको नामाम पास गरेका थिए।

महतले काठमाडौं जिल्ला अदालतबाट जारी भएको अधिकृत वारेसनामालगायत अन्य कागजात नक्कली बनाई उक्त जग्गा सिन्धुपाल्चोक फुल्पिङ्कट्टीका कमलकुमार श्रेष्ठको नाममा नामसारी गराएका थिए।

उक्त जग्गा महतले पोखराका प्रवीणमान श्रेष्ठलाई २०६४ चैत २४ गते ७५ लाखमा बेचेका थिए।
खरिदार राई २०७४ जेठ २२ गते पक्राउ परेका थिए।  महतलाई बिहीबार नै काठमाडौं जिल्ला अदालतमा बुझाइएको छ।